തൊടുപുഴ: നിരോധനം ലംഘിച്ച് സ്വകാര്യ വാഹനങ്ങളില്‍ എയര്‍ഹോണ്‍ ഉപയോഗം വ്യാപകമാകുന്നു. കാല്‍നടയാത്രക്കാര്‍ക്കും മുന്നില്‍ പോവുന്ന വാഹനത്തിലെ യാത്രക്കാര്‍ക്കും ഹാനികരമല്ലാത്ത ഹോണ്‍ ഉപയോഗിക്കണമെന്നാണ് മോട്ടോര്‍ വാഹന ചട്ടങ്ങള്‍ നിഷ്‌കര്‍ഷിക്കുന്നത്. ഇതു കാറ്റില്‍ പറത്തിയാണ് ബസുകള്‍ ഉള്‍പ്പെടെയുള്ള ഒട്ടുമിക്ക സ്വകാര്യ വാഹനങ്ങളിലേയും ഹോണുകള്‍ പ്രവര്‍ത്തിക്കുന്നത്.
ഇന്ത്യയില്‍ നിര്‍മിക്കുന്ന ഹോണുകള്‍ നിയമപരിധിക്കകത്തു മാത്രമുള്ള ശബ്ദം പുറപ്പെടുവിക്കുന്നതാണ്. എന്നാല്‍, വന്‍ശബ്ദം പുറപ്പെടുവി ക്കുന്ന ചൈനീസ് നിര്‍മിത ഹോണുകളാണ് ഇപ്പോള്‍ ഏറെയും. ഇവയ്ക്കു വിലയും കുറവാണ്.
നഗര പരിധിക്കുള്ളിലും തിരക്കേറിയ റൂട്ടുകളിലും 60 ഡെസിബലില്‍ താഴെ മാത്രം ശബ്ദമുണ്ടാക്കുന്ന ഹോണ്‍ മാത്രമേ ഉപയോഗിക്കാവൂ എന്ന് മോട്ടോര്‍ വാഹന വകുപ്പ് പറയുന്നു. സ്‌കൂള്‍, കോളജ്, ആരാധനാലയങ്ങള്‍, സര്‍ക്കാര്‍ ഓഫിസുകള്‍, ആശുപത്രി തുടങ്ങിയവയുടെ പരിസരങ്ങളില്‍ ഒരു തരത്തിലുമുള്ള ഹോണ്‍ ഉപയോഗിക്കാന്‍ പാടില്ല. വാഹനങ്ങള്‍ ടെസ്റ്റിനു പോവുമ്പോള്‍ സാധാരണ ഹോണുകള്‍ ആയിരിക്കും അവയില്‍ സ്ഥാപിച്ചിട്ടുണ്ടാവുക.
ടെസ്റ്റ് കഴിഞ്ഞുവന്നാല്‍ അവ അഴിച്ചുമാറ്റി പകരം മാരകമായ ശബ്ദം പുറപ്പെടു വിക്കുന്ന തരം ഹോണുകള്‍ കയറ്റുന്നു. സ്‌കൂളില്‍ പോകുന്ന കുട്ടികള്‍ ദിവസവും ഈ ശബ്ദം കേള്‍ക്കുന്നത് കേള്‍വിശക്തിക്ക് സാരമായ തകരാര്‍ വരുത്തുന്നതായി കണ്ടെത്തിയിട്ടുണ്ട്. ഒരു വയസില്‍ താഴെ പ്രായമുള്ള കുഞ്ഞുങ്ങളുടെ ചെവിയില്‍ ഇത്തരം ശബ്ദം പതിച്ചാല്‍ വളരെ വേഗം കേഴ്‌വിശക്തി നഷ്ട പ്പെടുമെന്നും അത് ജീവിതകാലം മുഴുവന്‍ നീണ്ടുനില്‍ക്കുമെന്നും ഡോക്ടര്‍മാര്‍ പറയുന്നു.
എയര്‍ ഹോണുകള്‍ ഉള്‍പ്പെടെ ഡെസിബല്‍ കൂടിയ ഹോണുകള്‍ ചെറുവാഹനങ്ങള്‍ പോലും ഉപയോഗിക്കുന്നുണ്ട്.
വാഹനങ്ങളില്‍ പലതും പൊലിസിനെ കാണുമ്പോഴും നഗരത്തില്‍ പ്രവേശിക്കുമ്പോഴും ഹോണുകളുടെ കണക്ഷന്‍ വേര്‍പെടുത്തുകയാണ് ചെയ്യാറ്. എന്നാല്‍ ഇപ്പോള്‍ അനുവദിച്ചിരി ക്കുന്ന ഡെസിബല്‍ മീറ്റര്‍ വാഹനത്തില്‍ ഉപയോഗിക്കുന്ന ഹോണുകളേതെന്ന് പെട്ടെന്ന് കണ്ടെത്താവുന്ന തരത്തിലുള്ളതാണ്.
ട്രാഫിക് പൊലിസിന് അനുവദിച്ച ഡെസിബല്‍ മീറ്റര്‍ ഇതുവരെ ഉപയോഗിച്ചു തുടങ്ങിയിട്ടില്ല. ഇരുചക്രവാഹനങ്ങള്‍ അടക്കമുള്ള ചെറുവാഹനങ്ങളില്‍ വിവിധതരം ജന്തുക്കളുടെ ശബ്ദം പുറപ്പെടുവിക്കുന്ന ഹോണുകള്‍ റോഡരികിലൂടെ നടന്നു പോകുന്ന യാത്രക്കാരെ ഭയപ്പെടുത്തുന്നു. ട്രാഫിക്ക് പൊലിസ് കൂടി നടപടിയുമായി ഇറങ്ങി യാല്‍ ഹോണിന്റെ ദുരുപയോഗം നിയന്ത്രിക്കാന്‍ കഴിയുമെന്ന പ്രതീക്ഷയാണ് ബന്ധപ്പെട്ടവര്‍ക്കുള്ളത്.