തൃശൂര്‍: എഴുത്തുകാരിയും തൃശൂര്‍ കേരളവര്‍മ കോളജിലെ അധ്യാപികയുമായ ദീപ നിശാന്തിനോട് ഫോണിലൂടെ അസഭ്യവര്‍ഷം നടത്തിയ കേസില്‍ മൂന്നു യുവാക്കളെ പൊലിസ് അറസ്റ്റ് ചെയ്തു. മാള പുത്തന്‍ചിറ സ്വദേശി അനൂപ്(20), നെടുപുഴ സ്വദേശി ആഷിക്(19), കോഴിക്കോട് ബാലുശ്ശേരി സ്വദേശി ലാലു(20) എന്നിവരെയാണ് തൃശൂര്‍ വെസ്റ്റ് പൊലിസ് അറസ്റ്റ് ചെയ്തത്. ബി.ജെ.പി അനുകൂല വാട്‌സ് ആപ്പ് ഗ്രൂപ്പുകളില്‍ ദീപയുടെ നമ്പര്‍ പോസ്റ്റ് ചെയ്തിരുന്നു. ഈ നമ്പറില്‍ തുടരെ വിളിക്കാനായിരുന്നു നിര്‍ദേശം. ഇങ്ങനെ ഒട്ടേറെ കോളുകള്‍ ദിനം പ്രതി ദീപയ്ക്ക് ലഭിച്ചു. വിളിച്ചവരുടെ പേരുവിവരങ്ങളും സംഭാഷണവും സഹിതമാണ് ദീപ പരാതി നല്‍കിയത്. സംഘ്പരിവാറിനെ വിമര്‍ശിച്ചുള്ള ഫേസ് ബുക്ക് പോസ്റ്റിനു ശേഷമായിരുന്നു ദീപ നിശാന്തിനെതിരേ സൈബര്‍ ആക്രമണം രൂക്ഷമായത്.
ദീപയുടെ മൂന്നു പരാതികളാണ് പൊലിസ് അന്വേഷിക്കുന്നത്. മോശം കമന്റുകളിട്ടവരുടെ സ്‌ക്രീന്‍ഷോട്ട്, വാട്‌സ് ആപ്പ് ഗ്രൂപ്പുകളില്‍ ദീപയുടെ നമ്പര്‍ സഹിതമുള്ള പോസ്റ്റ് തുടങ്ങിയ തെളിവുകള്‍ സഹിതമായിരുന്നു പരാതി നല്‍കിയത്. ഫേസ്ബുക്കില്‍ നിന്നും തെളിവുകള്‍ ലഭിച്ചാല്‍ കൂടുതല്‍ അറസ്റ്റ് ഉണ്ടാകും.
സോഷ്യല്‍മീഡിയയില്‍ സ്ത്രീ വിരുദ്ധ പരാമര്‍ശം നടത്തുന്നവര്‍ക്കും സ്ത്രീകളോട് അപമര്യാദയായി പെരുമാറുന്നവര്‍ക്കും പൊലിസ് നടപടി മുന്നറിയിപ്പാണെന്ന് ദിപാ നിശാന്ത് പ്രതികരിച്ചു.