തിരുവനന്തപുരം: ചെങ്ങന്നൂരിലെ വിജയം സജി ചെറിയാന്റെ മാത്രമല്ല, മുഖ്യമന്ത്രി പിണറായി വിജയന്റേത് കൂടിയാണ്. രണ്ടുവര്‍ഷം പൂര്‍ത്തിയാക്കിയ പിണറായി സര്‍ക്കാരിന് ലഭിച്ച ജന്മദിന സമ്മാനമാണിത്. കഴിഞ്ഞ രണ്ടുവര്‍ഷവും വിവാദങ്ങള്‍ മാത്രമായിരുന്നു മാധ്യമങ്ങളില്‍ നിറഞ്ഞുനിന്നത്.
കേരളം ഭരിച്ച ഇടത് സര്‍ക്കാരുകള്‍ക്കൊന്നും നേരിടേണ്ടിവന്നിട്ടില്ലാത്ത വിവാദങ്ങളാണ് പിണറായിയെ തേടിയെത്തിയത്. സെക്രട്ടേറിയറ്റിനു മുന്നില്‍ കാര്‍ പാര്‍ക്ക് ചെയ്യുന്നതായിരുന്നു ആദ്യ വിവാദം.
അത് കെട്ടടങ്ങിയപ്പോള്‍ മഹിജയുടെ നേരെയുള്ള പൊലിസ് അതിക്രമം, മൂന്നാര്‍, മന്ത്രി ശൈലജയുടെ കണ്ണട വിവാദം, ഓഖിദുരന്ത വിവാദം, മുഖ്യമന്ത്രിയുടെ ഹെലികോപ്ടര്‍ യാത്ര, ആദിവാസിയായ മധുവിന്റെ കൊല, വരാപ്പുഴയിലെ ലോക്കപ്പ് മരണം, കോട്ടയത്തെ ദുരഭിമാനക്കൊല എന്നിങ്ങനെ വിവാദങ്ങള്‍ ഓരോന്നായി വന്നു. ആര്‍ക്കും നീതിനല്‍കാത്ത വിഭാഗമാണ് കേരളാ പൊലിസെന്ന വാദം സജീവ ചര്‍ച്ചയായി. ഇതെല്ലാം ചെങ്ങന്നൂരില്‍ പ്രതിഫലിപ്പിക്കാനായിരുന്നു കോണ്‍ഗ്രസും ബി.ജെ.പിയും ശ്രമിച്ചത്.
പിണറായി സത്യപ്രതിജ്ഞ ചെയ്ത് 48 മണിക്കൂറിനുള്ളില്‍ തന്നെ പ്രതിപക്ഷവും ബി.ജെ.പിയും ക്രമസമാധാന നില തകര്‍ന്നുവെന്ന് പറഞ്ഞ് രംഗത്തുവന്നിരുന്നു. അത് ഇപ്പോഴും തുടരുന്നു.
കോണ്‍ഗ്രസിന്റെയും ബി.ജെ.പിയുടെയും കോട്ടകള്‍ തകര്‍ത്ത് റെക്കോര്‍ഡ് ഭൂരിപക്ഷത്തോടെയുള്ള സജി ചെറിയാന്റെ വിജയം പിണറായി സര്‍ക്കാരിന് ആത്മവിശ്വാസവും ആശ്വാസവും ഒരുപോലെ പകര്‍ന്നുനല്‍കുന്നതാണ്.
വര്‍ഗീയധ്രുവീകരണമെന്ന യു.ഡി.എഫ് ആരോപണത്തിന് മതേതര വോട്ടുകളുടെ ഏകീകരണം എന്ന മറുപടി നല്‍കാനും ഇടതുമുന്നണിക്കായി. അഴിമതിരഹിത ഭരണത്തിനും വികസനത്തിനും ലഭിച്ച അംഗീകാരമായാണ് സര്‍ക്കാര്‍ ഈ വിജയത്തെ കാണുന്നത്.
വിജയം ഉറപ്പിച്ചാല്‍ മാത്രം പോര വന്‍ ഭൂരിപക്ഷം നേടണമെന്ന നിര്‍ദേശമാണ് മുഖ്യമന്ത്രി പിണറായി വിജയന്‍ മണ്ഡലത്തിന്റെ ചുമതല നല്‍കിയിരുന്ന ഗോവിന്ദന്‍ മാസ്റ്റര്‍ക്ക് നല്‍കിയത്. അത് അടുക്കും ചിട്ടയുമായി നടപ്പാക്കുകയും ചെയ്തു.
സര്‍ക്കാരിന്റെ വികസനപ്രവര്‍ത്തനങ്ങള്‍ ചൂണ്ടിക്കാട്ടി ബ്രാഞ്ച് തലത്തില്‍ തന്നെ പ്രവര്‍ത്തകര്‍ വീടുകള്‍തോറും കയറിയിറങ്ങി. മതേതര ശക്തികളുടെ വോട്ട് സി.പി.എമ്മിലേക്ക് അടുപ്പിക്കാന്‍ തന്ത്രങ്ങളൊരുക്കി.
പിണറായി സര്‍ക്കാരിന്റെ വിലയിരുത്തലാകും ചെങ്ങന്നൂരിലെ ഫലമെന്നുപറഞ്ഞ വി.എസ് അച്യുതാനന്ദന്‍ അടക്കമുള്ളവരെ സഹകരിപ്പിച്ച് തെരഞ്ഞെടുപ്പ് പ്രചാരണത്തില്‍ കല്ലുകടിയുണ്ടാകാതെ നോക്കാന്‍ പിണറായിയും സി.പി.എം സംസ്ഥാന സെക്രട്ടറിയായ കോടിയേരി ബാലകൃഷ്ണനും പ്രത്യേകം ശ്രദ്ധിച്ചിരുന്നു. വിശ്വസ്തരെയെല്ലാം ചെങ്ങന്നൂരില്‍ എത്തിച്ചു.
എല്ലാം പിണറായി വിജയന്‍ തിരുവനന്തപുരത്തുനിന്ന് വിലയിരുത്തി. അവസാന നാളുകളില്‍ താരപ്രചാരകനായി. സജി ചെറിയാന്റെ ജയമൊരുക്കാനുള്ള തന്ത്രങ്ങള്‍ ഫലം കാണുമ്പോള്‍ പിണറായി ഭരണവും അഗ്‌നിശുദ്ധി വരുത്തുകയാണ്.
ഇനി പ്രതിപക്ഷ വാദങ്ങളെ ദുര്‍ബലമാക്കി ഭരണനേട്ടങ്ങള്‍ ഉയര്‍ത്തി സ്വന്തം തീരുമാനങ്ങളുമായി മുന്നോട്ടുപോകാനുള്ള പിണറായി വിജയന്റെ ആഗ്രഹത്തിന് ലഭിക്കുന്ന ജനവിധി കൂടിയാണിത്. തിങ്കളാഴ്ച ആരംഭിക്കുന്ന നിയമസഭാ സമ്മേളനത്തില്‍ ചെങ്ങന്നൂര്‍ നല്‍കിയ ഊര്‍ജത്തിന്റെ ശക്തിയുമായിട്ടാകും സര്‍ക്കാര്‍ പ്രതിപക്ഷത്തെ നേരിടുക.