ചെങ്ങമനാട്: അങ്കമാലി പറവൂര്‍ റൂട്ടില്‍ രാത്രിയില്‍ സ്വകാര്യ ബസ്സുകള്‍ ട്രിപ്പ് മുടക്കുന്നതായി പരാതി. ഇതുമൂലം രാത്രി എട്ട് കഴിഞ്ഞാല്‍ പറവൂരില്‍ നിന്ന് മാഞ്ഞാലി, കുന്നുകര, അടുവാശ്ശേരി, ചെങ്ങമനാട്, അത്താണി ഭാഗത്തേക്ക് വരേണ്ട യാത്രക്കാര്‍ കഷ്ടപ്പെടുകയാണ്.
രാവിലെ അഞ്ചുമുതല്‍ രാത്രി 10 വരെ സര്‍വീസ് നടത്താന്‍ അനുമതിയുണ്ടെങ്കിലും രാവിലെ ആറരയ്ക്ക് തുടങ്ങി രാത്രി എഴരയ്ക്ക് ട്രിപ്പ് നിര്‍ത്തുന്ന സ്ഥിതിയാണിപ്പോള്‍. മുപ്പതോളം ബസ്സുകള്‍ ഈ റൂട്ടില്‍ ഓടുന്നുണ്ട്. പക്ഷേ മിക്ക ബസ്സുകളും ഏഴരയോടെ ഓട്ടം നിര്‍ത്തുകയാണെന്ന് നാട്ടുകാര്‍ പറയുന്നു. വണ്ടിയില്ലാതെ പെരുവഴിയിലാകുന്ന യാത്രക്കാര്‍ ഓട്ടോയേയും മറ്റു സ്വകാര്യ വാഹനങ്ങളേയും ആശ്രയിച്ചാണ് വീടെത്തുന്നത്.
ട്രിപ്പ് മുടക്കുന്നത് സംബന്ധിച്ച് പലതവണ അധികൃതര്‍ക്ക് പരാതി നല്‍കിയെങ്കിലും പരിഹാരമുണ്ടായിട്ടില്ല.