തളിപ്പറമ്പ്: ഓട്ടോറിക്ഷയില്‍ ബാങ്ക്ജീവനക്കാരിയെ തട്ടിക്കൊണ്ടുപോകാന്‍ ശ്രമിച്ചതായി പരാതി. തളിപ്പറമ്പിലെ ഒരു അഭിഭാഷകന്റെ ഭാര്യയായ യാത്രക്കാരി കഴിഞ്ഞ ദിവസം രാത്രി എട്ടുമണിയോടെ തളിപ്പറമ്പിലെ ഓട്ടോ സ്റ്റാന്‍ഡില്‍ നിന്നു സഹകരണ ആശുപത്രിയിലേക്ക് പോകാന്‍ ഓട്ടോയില്‍ കയറിയതായിരുന്നു. ഡ്രൈവര്‍ കണ്ണൂര്‍ ഭാഗത്തുള്ള വഴിയിലൂടെ പൂക്കോത്തുനടയിലെ അഴീക്കോടന്‍ റോഡിലേക്കും അവിടെ നിന്നു തൃച്ഛംബരം ഭാഗത്തേക്കും പോയതോടെ യാത്രക്കാരി വണ്ടി നിര്‍ത്താന്‍ ആവശ്യപ്പെട്ടുവെങ്കിലും നിര്‍ത്തിയില്ല. എതിര്‍വശത്തു നിന്നു വാഹനം വന്നതിനാല്‍ ഓട്ടോറിക്ഷയുടെ വേഗത കുറച്ചപ്പോള്‍ ഇവര്‍ ചാടിയിറങ്ങി തൊട്ടടുത്ത വീട്ടില്‍ കയറി രക്ഷപ്പെടുകയായിരുന്നുവെന്ന് പരാതിയില്‍ പറയുന്നു. ഓട്ടോറിക്ഷ ഡ്രൈവറെക്കുറിച്ച് സൂചന ലഭിച്ചതായി തളിപ്പറമ്പ് പൊലിസ് അറിയിച്ചു