കഴക്കൂട്ടം: പുതിയ അധ്യയനവര്‍ഷത്തില്‍ പൊതുവിദ്യാലയങ്ങളില്‍ പ്രവേശനം നേടാന്‍ വിദ്യാര്‍ഥികളുടെ തിരക്ക്. കണിയാപുരം വിദ്യാഭ്യാസ ഉപജില്ലക്ക് കീഴിലുള്ള 79 സ്‌കൂളുകളില്‍ മിക്കയിടത്തും പുതിയതായി പ്രവേശനം നേടിയവരുടെ എണ്ണം മുന്‍ വര്‍ഷങ്ങളെ അപേക്ഷിച്ച് വളരെ കൂടുതലാണ്. ആകെ 600 കുട്ടികള്‍ പഠിക്കുന്ന കൊഞ്ചിറ യു.പി.എസില്‍ ഇത്തവണ 200 കുട്ടികളാണ് പുതുതായി പ്രവേശനം നേടിയത്.
പോത്തന്‍കോട്,കാട്ടായിക്കോണം, കണിയാപുരം, ആലുംമൂട്, തച്ചപ്പള്ളി, പാട്ടം, കോലിയക്കോട്, കന്യാകുളങ്ങര, പിരപ്പന്‍കോട്, പുങ്കുമ്മൂട്, പാറയ്ക്കല്‍, ചെമ്പഴന്തി മണക്കല്‍, അയിരൂപ്പാറ, കുളത്തൂര്‍ തുടങ്ങിയ സര്‍ക്കാര്‍ എല്‍.പി, യു.പി സ്‌കൂളുകളില്‍ ഇത്തവണ അഡ്മിഷനില്‍ വലിയ വര്‍ധനവ് ആണ് ഉണ്ടായിട്ടുള്ളതെന്ന് കണിയാപുരം എ.ഇ.ഒ മോഹന്‍കുമാര്‍ പറഞ്ഞു. ശ്രീകാര്യം, കഴക്കൂട്ടം തുടങ്ങിയ ഗവ.ഹൈസ്‌കൂളുകളിലും പുതിയ അഡ്മിഷന്‍ എടുത്ത കുട്ടികളുടെ എണ്ണത്തില്‍ വന്‍ വര്‍ധനവാണ് രേഖപ്പെടുത്തിയിട്ടുള്ളത്.