കരുനാഗപ്പള്ളി: കരുനാഗപ്പള്ളി, കൊല്ലം ഭാഗങ്ങളില്‍ കഞ്ചാവ് വില്‍പന സംഘത്തെ കരുനാഗപ്പള്ളി എക്‌സൈസ് പിടികൂടി. റെയ്ഞ്ച് ഇന്‍സ്‌പെക്ടര്‍ എ. ജോസ് പ്രതാപിന്റെ നേതൃത്വത്തിലുള്ള സംഘമാണ് കല്ലേലിഭാഗം സലിം (52), ഭാര്യ ബീന (45), ഓട്ടോ ഡ്രൈവര്‍, സഹായി കല്ലേലിഭാഗം തോപ്പില്‍ ലക്ഷം വീട് നിസാര്‍ (38) എന്നിവരെ ഓട്ടോയില്‍ സഞ്ചരിക്കുന്നതിനിടെ പിടികൂടിയത്. ഇവരില്‍നിന്ന് 2.200 ഗ്രാം കഞ്ചാവ് പിടികൂടി.
വര്‍ഷങ്ങളായി എക്‌സൈസിനെയും പൊലിസിനെയും വെട്ടിച്ച് കഞ്ചാവ് കച്ചവടം നടത്തിക്കൊണ്ടുവരികയായിരുന്നു ബീനയും ഭര്‍ത്താവ് സലീമും. ഇവര്‍ ഓട്ടോ ഡ്രൈവറുടെ സഹായത്തോടെയാണ് കഞ്ചാവ് വില്‍പന നടത്തിയിരുന്നത്.
നേരത്തെ എക്‌സൈസും പൊലിസും കമ്മിഷണറുടെ സ്‌പെഷല്‍ സ്‌ക്വാഡും നിരവധി തവണ അറസ്റ്റ് ചെയ്യാന്‍ ശ്രമിച്ചിരുന്നെങ്കിലും ഇവര്‍ രക്ഷപ്പെടുകയായിരുന്നു.
ഷാഡോ എക്‌സൈസ് അംഗങ്ങളായ വിജു, എസ്. ശ്യാംകുമാര്‍, സജീവ്കുമാര്‍, സിവില്‍ എക്‌സൈസ് ഓഫിസര്‍മാരായ റാസ്മിയ, ശ്രീമോള്‍ എന്നിവരുടെ നേതൃത്വത്തിലുള്ള സംഘമാണ് ഇവരെ പിടികൂടിയത്.