കൊല്‍ക്കത്ത: ഒരുലക്ഷം രൂപയുടെ വ്യാജ നോട്ടുകളുമായി രണ്ടുപേരെ മാള്‍ഡ ജില്ലാ പൊലിസ് അറസ്റ്റ് ചെയ്തു. കള്ളനോട്ടുകള്‍ സംബന്ധിച്ച രഹസ്യവിവരം ലഭിച്ച സാഹചര്യത്തില്‍ കാളിയാചൗക്കിനടുത്ത ഒരു വീട് റെയ്ഡ് ചെയ്താണ് പ്രതികളായ ബിഭൂഷന്‍ മണ്ഡല്‍, ബന്‍കിന്‍ സര്‍കാര്‍ എന്നിവരെ പിടികൂടിയത്. 2000 രൂപയുടെ 50 നോട്ടുകളാണ് ഇവരില്‍ നിന്ന് പിടിച്ചെടുത്തത്. കള്ളനോട്ടുകള്‍ ബംഗ്ലാദേശില്‍ നിര്‍മിച്ചതാണെന്ന് ഇവര്‍ പൊലിസിന് മൊഴി നല്‍കിയിട്ടുണ്ട്. കള്ളനോട്ട് പ്രചരിപ്പിക്കുന്ന സംഘത്തിലെ കണ്ണികളാണ് ഇവരെന്നും സംഭവത്തില്‍ കൂടുതല്‍പേര്‍ ഉള്‍പ്പെട്ടതായി സംശയിക്കുന്നതായും പൊലിസ് അറിയിച്ചു.