ശാസ്താംകോട്ട: മനക്കര നിവാസികളെ ബുദ്ധിമുട്ടിലാക്കി കെ.എ.പി കനാലിന്റെ ചോര്‍ച്ച. ഇത്മൂലം ദിവസങ്ങളായി തുടരുന്ന ശക്തമായ മഴയില്‍ വീടിന് പുറത്തേക്കിറങ്ങാന്‍ പോലും കഴിയാത്ത അവസ്ഥയിലാണ് നാട്ടുകാര്‍.
കനാലിന്റെ ചോര്‍ച്ച കാരണം പ്രദേശത്തെ വീടുകളിലേക്ക് മലിനജലം ഒഴുകിയെത്തുന്നതാണ് നാട്ടുകാരെ ദുരിതത്തിലാഴ്ത്തുന്നത്. കനത്ത മഴയ്‌ക്കൊപ്പം കനാല്‍ ചോരുന്നത് വഴി ഒഴുകിയെത്തുന്ന മലിനജലം താഴ്ന്ന ഭാഗങ്ങളിലുള്ള വീടുകളിലേക്കും ശുചിമുറികളിലേക്കും കിണറുകളിലേക്കും ഒഴുകുകയാണ്.
കാലപ്പഴക്കവും അധികൃതരുടെ അനാസ്ഥയും മൂലം കനാലിന്റെ ഇരുവശങ്ങളിലേയും കോണ്‍ക്രീറ്റ് പൊട്ടിപ്പൊളിഞ്ഞും ഇളകിയും കിടക്കുന്നതാണ് കനാല്‍ ചോരുന്നതിന് കാരണം. കനാലില്‍ ഏകദേശം ഒരു കിലോമീറ്ററോളം ഭാഗത്താണ് വന്‍തോതില്‍ വെള്ളം ചോരുന്നത്.
ചതുപ്പ് പ്രദേശമായതിനാല്‍ വീടുകളുടെ പരിസരത്തേക്ക് ഊറ്റി ഇറങ്ങി കിണറുകളും മറ്റും കവിഞ്ഞൊഴുകുകയാണ്. വെള്ളത്തോടപ്പം മലിന വസ്തുക്കളും പറമ്പുകളില്‍ കെട്ടി നില്‍ക്കുന്നതിനാല്‍ കിണര്‍ ജലവും ഉപയോഗിക്കാനാകാതെ ദുരിതമനുഭവിക്കുകയാണ് നാട്ടുകാര്‍. കൂടാതെ ശൗചാലയ ടാങ്കുകള്‍ നിറഞ്ഞ് കവിയുന്നതിനാല്‍ പ്രാഥമികാവശ്യങ്ങള്‍ പോലും നിര്‍വഹിക്കാന്‍ കഴിയാത്ത സ്ഥിതിയിലാണ് പ്രദേശവാസികള്‍. അതേസമയം ഇക്കാര്യം ചൂണ്ടിക്കാട്ടി നിരവധി തവണ പ്രദേശവാസികള്‍ അധികൃതര്‍ക്ക് പരാതി നല്‍കിയെങ്കിലും തുടര്‍നടപടികളൊന്നും ഉണ്ടായിട്ടില്ല.