കാസര്‍കോട്: കഴിഞ്ഞ ദിവസം കൊവിഡ് സ്ഥിരീകരിച്ചവരുടെ കൂട്ടത്തില്‍ എസ്.എസ്.എല്‍.സി പരീക്ഷ എഴുതിയ വിദ്യാര്‍ഥിനിയും. ഇതോടെ വിദ്യാര്‍ഥിനി പരീക്ഷ എഴുതിയ ക്ലാസില്‍ പരീക്ഷയില്‍ സംബന്ധിച്ച വിദ്യാര്‍ഥികളും ഇവരുടെ രക്ഷിതാക്കളും അധ്യാപകരും ആശങ്കയിലായി. കാഞ്ഞങ്ങാട് ദുര്‍ഗാ ഹൈസ്‌കൂളിലാണ് വിദ്യാര്‍ഥിനി പരീക്ഷ എഴുതിയത്. ആറ് പരീക്ഷകളിലും കുട്ടി സംബന്ധിച്ചിരുന്നു.
കൊവിഡ് ബാധയുടെ പശ്ചാത്തലത്തില്‍ ഓരോ ക്ലാസിലും ഇരുപത് വീതം കുട്ടികളെ ഇരുത്തിയാണ് പരീക്ഷ നടത്തിയിരുന്നത്. മറ്റ് സുരക്ഷാ നടപടികളും സ്വീകരിച്ചിരുന്നു. പിന്നീടാണ് വിദേശത്തു നിന്നെത്തിയ കുട്ടിയുടെ പിതാവിന് കൊവിഡ് സ്ഥിരീകരിക്കുന്നത്. ഇതോടെ വിദ്യാര്‍ഥിനിയും നിരീക്ഷണത്തിലായി. തുടര്‍ന്ന് ക്ലാസില്‍ ഒപ്പമുണ്ടായിരുന്ന വിദ്യാര്‍ഥികളോടും പരീക്ഷാ ചുമതലയുള്ള അധ്യാപകരോടും നിരീക്ഷണത്തില്‍ പോകാന്‍ അറിയിച്ചിരുന്നുവെന്ന് പ്രധാനാധ്യാപകന്‍ ടി.വി പ്രദീപ് കുമാര്‍ വ്യക്തമാക്കി. ആരോഗ്യ വകുപ്പിനെയും വിവരം അറിയിച്ചു. കഴിഞ്ഞ ദിവസം കുട്ടിക്കും കൊവിഡ് സ്ഥിരീകരിക്കുകയായിരുന്നു.
ജില്ലയില്‍ കൊവിഡ് ബാധ റിപ്പോര്‍ട്ട് ചെയ്ത സാഹചര്യത്തില്‍ എസ്.എസ്.എല്‍.സി, പ്ലസ് ടു പരീക്ഷകള്‍ മാറ്റി വെക്കണമെന്ന് ശക്തമായ ആവശ്യം ഉയര്‍ന്നിരുന്നെങ്കിലും കൂടുതല്‍ പേരിലേക്ക് രോഗം പടര്‍ന്നപ്പോഴാണ് പരീക്ഷകള്‍ മാറ്റിവെച്ചത്.