തൊടുപുഴ: തനിക്കെതിരെ നടക്കുന്ന കൈയേറ്റ ആരോപണങ്ങള്‍ നിഷേധിച്ച് രേഖകളുമായി ദേവികുളം എം.എല്‍.എ എസ്. രാജേന്ദ്രന്‍. മൂന്നാറില്‍ തന്റെ വീടിരിക്കുന്ന എട്ട് സെന്റ് സ്ഥലത്തിന്റെ പട്ടയമാണ് രാജേന്ദ്രന്‍ ഇടുക്കി പ്രസ് ക്ലബില്‍ സി.പി.എം ജില്ലാ സെക്രട്ടറി കെ.കെ ജയചന്ദ്രനൊപ്പം നടത്തിയ വാര്‍ത്താസമ്മേളനത്തില്‍ മാധ്യമപ്രവര്‍ത്തകര്‍ക്കു മുന്നില്‍ പ്രദര്‍ശിപ്പിച്ചത്. ഈ സ്ഥലത്തിന്റെ പേരില്‍ കരമൊടുക്കിയ രേഖ ഹാജരാക്കാന്‍ അദ്ദേഹത്തിനായില്ല. ഇതുസംബന്ധിച്ച് കേസ് ഹൈക്കോടതിയില്‍ നില്‍ക്കുന്നതിനാല്‍ കരമൊടുക്കാന്‍ കഴിയുന്നില്ലെന്നാണ് അദ്ദേഹം പറഞ്ഞത്.
കെ.എസ്.ഇ.ബിയുടെ കൈവശമുള്ള ഭൂമിയില്‍നിന്ന് അപേക്ഷകര്‍ക്ക് നല്‍കാന്‍ ഏറ്റെടുത്ത ഭൂമിയാണ് തന്റെ കൈവശമുള്ളത്. ലാന്‍ഡ് അസൈന്‍മെന്റ് കമ്മിറ്റി തീരുമാനത്തിന്റെ ഭാഗമായിട്ടായിരുന്നു ഭൂമി ഏറ്റെടുത്തത്.
ഇതിന് 2001 ഡിസംബര്‍ 12ന് തഹസില്‍ദാര്‍ പട്ടയം അനുവദിച്ചതായും എസ്. രാജേന്ദ്രന്‍ എം.എല്‍.എ പറഞ്ഞു. തനിക്കെതിരേ റിപ്പോര്‍ട്ട് നല്‍കിയ ലാന്‍ഡ് റവന്യു കമ്മിഷണര്‍ എം.സി. മോഹന്‍ദാസ് മൂന്നാര്‍ ദൗത്യസംഘത്തില്‍ അംഗമായിരുന്നുവെന്നും രാജേന്ദ്രന്‍ കൂട്ടിച്ചേര്‍ത്തു.