മഞ്ചേരി: നഗരസഭയിലെ പാലക്കുളം വാര്‍ഡ് ഉപതെരഞ്ഞെടുപ്പില്‍ 82.37 ശതമാനം പോളിങ്. രണ്ടു ബൂത്തുകളിലും ഇലക്ട്രോണിക് വോട്ടിങ് യന്ത്രമുപയോഗിച്ചായിരുന്നു വോട്ടെടുപ്പ് നടന്നത്. സംവരണ വാര്‍ഡായ പാലക്കുളത്ത് യു.ഡി.എഫ് സ്ഥാനാര്‍ഥി കട്ടിലപറമ്പില്‍ വേലായുധനും എല്‍.ഡി.എഫ് സ്ഥാനാര്‍ഥി മാടംകോട് ജയരാജനും തമ്മിലായിരുന്നു പ്രധാന മത്സരം.
ഇത്തവണ എസ്.ഡി.പി.ഐ, ബി.ജെ.പി പാര്‍ട്ടികള്‍ മത്സര രംഗത്തുണ്ടായിരുന്നില്ല. യു.ഡി.എഫ് കൗണ്‍സിലറായിരുന്ന രാമചന്ദ്രന്‍ എന്ന മാനുട്ടിയുടെ നിര്യാണത്തെ തുടര്‍ന്നുവന്ന ഒഴിവിലേക്കാണ് ഉപതെരെഞ്ഞെടുപ്പ്. കഴിഞ്ഞ തെരഞ്ഞെടുപ്പില്‍ യു.ഡി.എഫ് പാലക്കുളത്ത് 388 വോട്ടുകളായിരുന്നു നേടിയിരുന്നത്. 336 വോട്ടുകള്‍ ഇടതുപക്ഷത്തിനും നേടാനായിരുന്നു. ഉപതെരഞ്ഞെടുപ്പ് ഫലം ഇന്നറിയാം. മഞ്ചേരി ഗവ. ഗേള്‍സ് ഹയര്‍ സെക്കന്‍ഡറി സ്‌ക്കൂളില്‍ രാവിലെ എട്ടിന് വോട്ടെണ്ണല്‍ ആരംഭിക്കും.