സിംഗപ്പൂര്‍ സിറ്റി: അഞ്ചു ദിവസത്തെ ത്രിരാഷ്ട്ര സന്ദര്‍ശത്തിനായി പോയ പ്രധാനമന്ത്രി നരേന്ദ്ര മോദി സിംഗപ്പൂരില്‍. പ്രധാനമന്ത്രി ലീ സെന്‍ ലൂങുമായി മോദി കൂടിക്കാഴ്ച നടത്തി.

ഇന്ത്യയുടെ ഡിജിറ്റല്‍ പണമിടപാട് സംവിധാനമായ റുപേ, നെറ്റ്‌സ് തുടങ്ങിയവയുടെ അന്താരാഷ്ട്ര ലോഞ്ചിങും ഇരുവരും ചേര്‍ന്ന് നടത്തി. ഇന്ത്യന്‍ ടൂറിസ്റ്റുകള്‍ക്ക് സിംഗപ്പൂരില്‍ റുപേ കാര്‍ഡ് ഉപയോഗിക്കാമെന്ന് പരിപാടിയില്‍ ലീ സെന്‍ പറഞ്ഞു. ഛാങി വിമാനത്താവളത്തിലും തെരഞ്ഞെടുക്കപ്പെട്ട കേന്ദ്രങ്ങളിലുമായിരിക്കും ഇതിന് അവസരമുണ്ടാവുക.

പ്രതിരോധ മേഖലയില്‍ ഇരുരാജ്യങ്ങളും തമ്മില്‍ കരാറുകളില്‍ ഒപ്പുവച്ചു. നാവിക സൈന്യങ്ങള്‍ തമ്മിലുള്ള സഹകരണ കരാറാണ് പ്രധാനപ്പെട്ടത്. ഇന്ത്യ- സിംഗപ്പൂര്‍ വാര്‍ഷിക നാവിക പരിശീലനത്തിന്റെ 25-ാം വാര്‍ഷികാഘോഷം ഇക്കൊല്ലമുണ്ടാവുമെന്നും പ്രഖ്യാപിച്ചു.

ഇരുരാജ്യങ്ങളും തമ്മില്‍ പുതിയ എയര്‍ സര്‍വീസ് കരാര്‍ ഉടന്‍ ഉണ്ടാക്കുമെന്ന് മോദി പറഞ്ഞു. പ്രധാനപ്പെട്ട കമ്പനികളുടെ സി.ഇ.ഒമാര്‍ ഇന്ത്യയെ ആത്മവിശ്വാസത്തോടെ കാണുന്നതില്‍ സന്തോഷമുണ്ടെന്നും അദ്ദേഹം പറഞ്ഞു.