ലക്‌നൗ: ഉത്തര്‍പ്രദേശില്‍ ട്രെയിന്‍ പാളം തെറ്റി ഒമ്പത് പേര്‍ക്ക് പരുക്കേറ്റു. മഹാകൗശല്‍ എക്‌സ്പ്രസ്സിന്റെ എട്ട് ബോഗികളാണ് പാളം തെറ്റിയത്. ലക്‌നൗവില്‍ നിന്നും 270 കി.മീറ്റര്‍ അകലെയുള്ള കുല്‍പഹാറിന് സമീപമാണ് പാളം തെറ്റിയത്. അപകടത്തില്‍ ഒമ്പത് പേര്‍ക്ക് പരുക്കേറ്റതായി റിപ്പോര്‍ട്ടുണ്ട്. പരുക്കേറ്റവരില്‍ ആറു പേരുടെ നില ഗുരുതരമാണ്. പുലര്‍ച്ചെ 2.07ഓടുകൂടിയാണ് അപകടമുണ്ടായതെന്ന് നോര്‍ത്ത് സെന്‍ട്രല്‍ റെയില്‍വേ ചീഫ് പബ്ലിക് റിലേഷന്‍സ് ഓഫിസര്‍ അറിയിച്ചു. രക്ഷാപ്രവര്‍ത്തനം പുരോഗമിക്കുകയാണെന്ന് റെയില്‍വേ അധികൃതര്‍ അറിയിച്ചു. മധ്യപ്രദേശില്‍ ജബല്‍പൂരില്‍ നിന്നും ഡല്‍ഹിക്കു പോവുകയായിരുന്നു ട്രെയിന്‍.

18 പേര്‍ക്ക് പരുക്കേറ്റതായി ദൃക്‌സാക്ഷികള്‍ പറഞ്ഞതായി ദേശീയമാധ്യമങ്ങള്‍ റിപ്പോര്‍ട്ട് ചെയ്തു. പരുക്കേറ്റവരെ മഹോബയിലെ ജില്ലാ ആശുപത്രിയില്‍ പ്രവേശിപ്പിച്ചു. ട്രെയിനിന്റെ നാല് എയര്‍കണ്ടീഷന്‍ഡ് ബോഗികളും നാല് ജനറല്‍ കംപാര്‍ട്ട്‌മെന്റുകളുമാണ് പാളം തെറ്റിയത്.