കോട്ടക്കല്‍: ഗവ.രാജാസ് സ്‌കൂളിലെ വെള്ളക്കെട്ടില്‍വീണ് അപകടത്തില്‍പെട്ട വിദ്യാര്‍ഥി സുമനസുകളുടെ കനിവ് തേടുന്നു. ചെനക്കല്‍ സര്‍ഹിന്ദ് നഗറിലെ നമ്പി വീട്ടില്‍ സലീമിന്റെ മകന്‍ സഫ്‌വാനാണ് സ്‌കൂളിലെ വെള്ളക്കെട്ടില്‍ വീണ് കൈകാലുകള്‍ കുഴഞ്ഞ് കിടപ്പിലായിരിക്കുന്നത്. മൂന്നു വര്‍ഷം മുമ്പ് നീന്തല്‍ പരിശീലനത്തിനായി വെള്ളക്കെട്ടിലേക്ക് ഇറങ്ങിയപ്പോഴാണ് അപകടം സംഭവിച്ചത്. നീന്തല്‍ അറിയാത്ത സഫ്‌വാന്‍ ചെളിയില്‍ താഴ്ന്ന്‌പോവുകയും 15 മിനുട്ടോളം വെള്ളത്തില്‍ കിടക്കുകയും തലച്ചോറിലേക്ക് ചെളി കയറി അബോധാവസ്ഥയിലാവുകയുമായിരുന്നു. ഇപ്പോള്‍ തൃശൂര്‍ ജൂബിലി ഹോസ്പിറ്റലില്‍ മാസത്തില്‍ 12000 രൂപ ചെലവഴിച്ചാണ് ചികിത്സിക്കുന്നത്. അബോധാവസ്ഥയിലുള്ള സഫ്‌വാന്‍ ഇപ്പോള്‍ ശബ്ദവും മറ്റും തിരിച്ചറിയുന്നുണ്ട്. വിദഗ്ദ ചികിത്സയിലൂടെ പൂര്‍ണമായും സുഖപ്പെടുമെന്നാണ് ഡോക്ടര്‍മാര്‍ പറയുന്നത്. സലീമിന്റെ ഏക മകനായ സഫ്‌വാന്റെ ചികിത്സക്കായി നാട്ടുകാര്‍ കമ്മിറ്റി രൂപീകരിച്ചിരുന്നു. ഇതിലൂടെ ലഭിക്കുന്ന സഹായങ്ങള്‍ വഴിയാണ് ചികിത്സ നടന്നുവരുന്നത്. മുഴുസമയവും പരിചരണത്തിനായി ഒരാള്‍ കൂടെ വേണം. നിര്‍ദ്ധന കുടുംബത്തിന്റെ അത്താണിയായ സഫ്‌വാനെ സഹായിക്കുന്നതിന് പുത്തനത്താണി ഫെഡറല്‍ ബാങ്കില്‍ ജോയിന്റ് അക്കൗണ്ട് തുടങ്ങിയിട്ടുണ്ട്. അക്കൗണ്ട് നമ്പര്‍: 15430100087586, ഐ.എഫ്.എസ.സി കോഡ്: എഫ്.ഡി.ആര്‍.എല്‍.0001543, ഫെഡറല്‍ ബാങ്ക് പുത്തനത്താണി ബ്രാഞ്ച്. ഫോണ്‍: 9496844070.