കൊടുങ്ങല്ലൂര്‍: തീരദേശം കേന്ദ്രീകരിച്ച് മണല്‍മാഫിയ പിടിമുറുക്കുന്നു. കൊടുങ്ങല്ലൂര്‍ തുറമുഖത്തിനുവേണ്ടിയുള്ള കപ്പല്‍ചാല്‍ നിര്‍മിക്കുന്നതിന് ഡ്രഡ്ജിങ്ങ് നടത്തി സര്‍ക്കാര്‍ ശേഖരിച്ച മണല്‍ശേഖരം പൊലിസിന്റെയും അധികൃതരുടെയും ഒത്താശയോടെ മണല്‍മാഫിയ കടത്തികൊണ്ടുപോയതായാണ് നാട്ടുകാരുടെ പരാതി. അഴീക്കോട് പൂച്ചക്കടവ് ഭാഗത്താണ് നിര്‍ദിഷ്ട തുറമുഖത്തിന് വേണ്ടി രണ്ട് വര്‍ഷം മുമ്പ് നാലുകോടി രൂപയോളം ചെലവഴിച്ച് ഡ്രഡ്ജിങ്ങ് നടത്തിയത്. ഇതില്‍ നിന്നും ലഭിച്ച മണല്‍ ഉപയോഗിച്ച് കപ്പല്‍ശാലക്കാവശ്യമായ ഇരുപതേക്കറോളം സ്ഥലം നികത്തിയെടുക്കാനാണ് സര്‍ക്കാരിന് പദ്ധതിയുണ്ടായിരുന്നത്. എന്നാല്‍ ഈ മണല്‍ശേഖരം ഒരു തരിപോലും ബാക്കിവെക്കാതെ മണല്‍മാഫിയ സംഘം പരസ്യമായി കടത്തികൊണ്ടുപോകുകയാണ്. ഇതോടെ തുറമുഖ നിര്‍മാണത്തിനും തുറമുഖവകുപ്പ് വിട്ടുകൊടുത്ത ഇരുപതേക്കറോളം സ്ഥലം പഴയപടി തന്നെ കിടക്കുകയാണ്. പഞ്ചായത്ത് മണല്‍ പാസ് അനുവദിച്ച് തുടങ്ങിയതോടെ ഈ പാസ് ഉപയോഗിച്ച് ഇവിടെ നിന്നും അനധികൃത മണല്‍കടത്ത് തുടരുകയാണ്.
ഇതിന് പുറമേ അഴീക്കോട് കാഞ്ഞിരപ്പുഴയില്‍ നിന്നും പരിസ്ഥിതി ആഘാത പഠനവും മണല്‍ അടിഞ്ഞുകൂടുന്നതിന്റെ അളവും കണക്കിലെടുക്കാതെ ദിനംപ്രതി ടണ്‍ കണക്കിന് മണലാണ് ഇവിടെ നിന്നും കയറ്റിപോകുന്നത്. തുറമുഖവകുപ്പ് പ്രദേശത്തെ എട്ട് മണല്‍വാരല്‍ സൊസൈറ്റികള്‍ക്കായി നല്‍കിയിട്ടുള്ള പാസുകളുടെ മറവിലാണ് പകല്‍കൊള്ള നടക്കുന്നത്. ഇത്തരത്തിലുള്ള മണല്‍വാരല്‍ ദേശീയപാത പതിനേഴിലെ കോട്ടപ്പുറം പാലത്തിന്റെ നിലനില്‍പ്പിനുതന്നെ ഭീഷണിയായി മാറിക്കഴിഞ്ഞു. കോട്ടപ്പുറം പാലം മുതല്‍ അഴീക്കോട് അഴിമുഖം വരെയുള്ള ഭാഗത്തുനിന്നാണ് മണല്‍വാരല്‍ നടന്നുവരുന്നത്.