തിരുവനന്തപുരം: പിണറായി സര്‍ക്കാരിനുവേണ്ടി ധനമന്ത്രി തോമസ് ഐസക് നിയമസഭയുടെ മേശപ്പുറത്തുവച്ച ധവളപത്രത്തിന് പിന്നില്‍ രാഷ്ട്രീയലക്ഷ്യം മാത്രമാണുള്ളതെന്ന് മുന്‍ മുഖ്യമന്ത്രി ഉമ്മന്‍ചാണ്ടി. ധനമന്ത്രി അവതരിപ്പിച്ച കണക്കുകളില്‍ അവ്യക്തത മാത്രമാണുള്ളത്. ഐസക്കിനു വേണ്ട കണക്കുകള്‍ മാത്രമാണ് അതില്‍ എടുത്തുകാണിച്ചിട്ടുള്ളത്. യു.ഡി.എഫ് സര്‍ക്കാരിനെ കുറ്റപ്പെടുത്തുക എന്ന ലക്ഷ്യം മാത്രമാണ് ധവളപത്രത്തിലുടനീളമുള്ളതെന്നും ഉമ്മന്‍ചാണ്ടി പറഞ്ഞു.
അഞ്ചുകൊല്ലം ചെയ്തത് മുഴുവന്‍ തെറ്റാണെന്ന് പറഞ്ഞാല്‍ ജനം അതു അംഗീകരിക്കില്ല. ബജറ്റ് സമയത്തു എല്ലാ സര്‍ക്കാരും വരുമാനം കൂട്ടിക്കാണിക്കാറുണ്ട്. സ്വാഭാവികമായ നടപടിയാണത്. നികുതി പിരിവിലും ടാര്‍ജറ്റ് നിശ്ചയിക്കാറുണ്ട്. എന്നാല്‍ അതു പൂര്‍ണമായും ലഭിക്കാതെ വരുന്നതിനെ പര്‍വതീകരിച്ച് കാണിച്ചു വലിയൊരു കുറവായി ചിത്രീകരിക്കാനാണ് ഐസക് ശ്രമിക്കുന്നത്. എല്‍.ഡി.എഫ് സര്‍ക്കാരിന്റെ കാലത്ത് 71 ശതമാനമായിരുന്ന കടബാധ്യത യു.ഡി.എഫിന്റെ കാലത്ത് 97 ശതമാനമായി കൂടി എന്നത് വസ്തുതയാണ്. എന്നാല്‍ വന്‍വികസന പദ്ധതികള്‍ക്കും അടിസ്ഥാന സൗകര്യവികസനത്തിനും വേണ്ടിയാണ് ഈ തുകയെല്ലാം വിനിയോഗിച്ചത്. ഇന്നുചെയ്യേണ്ട വികസനപ്രവര്‍ത്തനങ്ങള്‍ വൈകിപ്പിച്ച് വര്‍ഷങ്ങള്‍ കഴിഞ്ഞാല്‍ ഇരട്ടി തുക അതിനായി ചെലവിടേണ്ടിവരുമെന്നും മുന്‍മുഖ്യമന്ത്രി പറഞ്ഞു.