റിയാദ്: കൊറോണ വൈറസ് വ്യാപനം തടയുന്നതിന്റെ ഭാഗമായി സര്‍വീസ് നിര്‍ത്തിവെച്ചിരിക്കുന്ന വിമാന കമ്പനികള്‍ വന്‍ പ്രതിസന്ധിയിലേക്ക്. 1,300 വിമാനങ്ങള്‍ സര്‍വീസ് നടത്തുന്ന മിഡില്‍ ഈസ്റ്റില്‍ വിമാന കമ്പനികളുടെ വരുമാനം ഈ വര്‍ഷം 1900 കോടി ഡോളര്‍ കുറയുമെന്നാണ് പ്രതീക്ഷിക്കുന്നതെന്നാണ് വിമാന കമ്പനികളുടെ കൂട്ടായ്മയായ അയാട്ടയുടെ വിലയിരുത്തൽ. കഴിഞ്ഞ വര്‍ഷത്തെ അപേക്ഷിച്ച് 39 ശതമാനം ഇടിവാണിത്.

നേരത്തെ തന്നെ വലിയ ലാഭത്തിലല്ലാത്ത മധ്യപൗരസ്ത്യ ദേശത്തെ വിമാന കമ്പനികള്‍ ഇതിനകം തന്നെ സര്‍ക്കാരുകളുടെ അടിയന്തര സഹായം ആവശ്യപ്പെട്ടിട്ടുണ്ട്. സര്‍ക്കാര്‍ സഹായം ലഭിച്ചില്ലെങ്കില്‍ വിമാന കമ്പനികളുടെ നിലനില്‍പും ഭാവിയും അപകടത്തിലാകുമെന്ന് അറബ് എയര്‍ കാരിയേഴ്‌സ് ഓര്‍ഗനൈസേഷനും (എ.എ.സി.ഒ) ഇന്റര്‍നാഷനല്‍ എയര്‍ ട്രാന്‍സ്‌പോര്‍ട്ട് അസോസിയേഷനും (അയാട്ട) മുന്നറിയിപ്പ് നൽകി.

പതിനായിരക്കണക്കിന് യാത്രക്കാരെ നഷ്ടമാകുന്ന മേഖലയില്‍ എട്ട് ലക്ഷത്തോളം ജോലിയെ ബാധിക്കുമെന്നാണ് അയാട്ടയുടെ വിലയിരുത്തൽ. കോവിഡ് 19 വ്യാപനത്തിന്റെ പശ്ചാത്തലത്തില്‍ മുന്‍കരുതല്‍ നടപടികളുടെ ഭാഗമായി  വിമാനത്താവളങ്ങള്‍ അടക്കുന്നതിനും വിമാനങ്ങള്‍ നിര്‍ത്തിവെക്കുന്നതിനും അധികൃതര്‍ കര്‍ശന നപടികളാണ് സ്വീകരിച്ചത്. എയര്‍ലൈന്‍ വ്യവസായം അതിന്റെ ഗുരുതരമായ പ്രതിസന്ധിയാണ് അഭിമുഖീകരിക്കുന്നതെന്നും വിമാന കമ്പനികളെ സംബന്ധിച്ചിടത്തോളം ഇപ്പോള്‍ മഹാദുരന്തമാണ് നേരിടുന്നതെന്നും അയാട്ട മേധാവി അലക്‌സാണ്ടര്‍ ഡി. ജൂനിയാക്  പറഞ്ഞു.