അബുദാബി: കൊവിഡ് 19 പ്രതിസന്ധിയില്‍ നിന്ന് കരകയാറാന്‍ സ്വകാര്യമേഖലയ്ക്ക് അനുകൂല തീരുമാനവുമായി യു.എ.ഇ. ജീവനക്കാരുമായുള്ള കരാര്‍ ബന്ധം പുന ക്രമീകരിക്കാന്‍ യു.എ.ഇ മാനവ വിഭവശേഷി, എമിറൈസേഷന്‍ മന്ത്രാലയമാണ് അനുമതി നല്‍കിയത്.

തീരുമാനത്തില്‍ നിന്ന് യു.എ.ഇ സ്വദേശികളായ ജീവനക്കാരെ ഒഴിവാക്കിയിട്ടുണ്ട്. ഫലത്തില്‍ ഇത് ഇന്ത്യക്കാര്‍ ഉള്‍പ്പടെയുള്ള വിദേശികളെ ദോഷകരമായി ബാധിക്കും. എന്നാല്‍ തൊഴിലാളിയും തൊഴില്‍ ഉടമയും പരസ്പര സമ്മതത്തോടെ ക്രമേണ സ്വീകരിക്കുന്ന നടപടിക്രമങ്ങളിലൂടെയാണ് ഈ കരാര്‍ മാറ്റങ്ങള്‍ വരുത്തേണ്ടതെന്നു ഉത്തരവില്‍ പറയുന്നു.

ഇതനുസരിച്ച് ജോലി സ്ഥലത്ത് നിന്ന് അല്ലാതെ ജോലി ചെയ്യാന്‍ അനുവദിക്കുക, ജീവനക്കാര്‍ക്ക് ശമ്പളത്തോടുകൂടിയ അവധി നല്‍കുക, ശമ്പളമില്ലാത്ത അവധി നല്‍കുക, മേല്‍പ്പറഞ്ഞ കാലയളവില്‍ ശമ്പളം താല്‍ക്കാലികമായി കുറയ്ക്കുക, ശമ്പളം സ്ഥിരമായി കുറയ്ക്കുക തുടങ്ങി ഏത് നടപടിയും ക്രമേണ സ്വീകരിക്കാം.

ജീവനക്കാരന്റെ ശമ്പളം ശാശ്വതമായി കുറയ്ക്കാന്‍ ആഗ്രഹിക്കുന്ന കമ്പനികള്‍ മന്ത്രാലയത്തിന്റെ മുന്‍കൂര്‍ അനുമതി നേടിയിരിക്കണമെന്നും ഉത്തരവില്‍ പറയുന്നു. മാര്‍ച്ച് 26 മുതല്‍ പ്രാബല്യത്തില്‍ വരുന്നതാണ് പുതിയ തീരുമാനം.