സിയാല്‍ തൊഴിലാളികളുടെ സേവന വേതന വ്യവസ്ഥയില്‍ കരാറായി
നെടുമ്പാശ്ശേരി: അന്താരാഷ്ട്ര വിമാനത്താവളത്തില്‍ സിയാലിന് കീഴില്‍ ജോലി ചെയ്യുന്ന ഹൗസ് കീപ്പിംഗ്, ക്ലീനിംഗ് വിഭാഗങ്ങളിലെ തൊഴിലാളികളൂടെ സേവന വേതന വ്യവസ്ഥകളെ സംബന്ധിച്ചുള്ള കരാറായി. ഒരു വര്‍ഷത്തെ കാലാവധിയുള്ള കരാറാണ് റീജണല്‍ ജോയിന്റ് ലേബര്‍ കമ്മിഷണര്‍ നാരായണന്‍ നമ്പൂതിരിയുടെ സാന്നിധ്യത്തില്‍ വിവിധ കരാര്‍ കമ്പനികളുടെ പ്രതിനിധികളും തൊഴിലാളി യൂണിയന്‍ പ്രതിനിധികളും ചേര്‍ന്ന് ഒപ്പിട്ടത്.
ആലുവ പാലസില്‍ വച്ച് നടന്ന ചര്‍ച്ചയിലാണ് സേവന വേതന വ്യവസ്ഥകളെ സംബന്ധിച്ച് ധാരണയായത്. കരാര്‍ പ്രകാരം ഒരോ തൊഴിലാളിക്കും പ്രതിമാസ ശബളത്തില്‍ 9528 രൂപ മുതല്‍ 14500 രൂപ വരെ ആറ് ഘടകങ്ങളിലായി വര്‍ധനവ് ഉണ്ടാകും.
മാനേജ്‌മെന്റുകള്‍ക്കു വേണ്ടി പി രവീന്ദ്രന്‍ , എസ് ശ്രീജിത്ത് , സുധാമണി തുടങ്ങിയവരും ട്രേഡ് യുണിയനുകള്‍ക്കു വേണ്ടി വി പി ജോര്‍ജ് , കെ ടി കുഞ്ഞുമോന്‍ , ഷിജോ തച്ചപ്പിള്ളി , സീനാ ശശി , കെ ജെ ശശി , എ എസ് സുരേഷ് , ലീനാ അച്ചു തുടങ്ങിയവരും പങ്കെടുത്തു.