പെരുമ്പാവൂര്‍: പത്തു വയസുകാരിയെ ഒരു വര്‍ഷമായി പീഡിപ്പിച്ച കേസില്‍ മാതാവിന്റെ കാമുകന്മാരും കൂട്ടുനിന്നതിന് മാതാവും അറസ്റ്റില്‍. കുട്ടിയുടെ ബന്ധുവായ ഇടുക്കി സൂര്യനെല്ലി സ്വദേശിയും ഇപ്പോള്‍ വളയന്‍ചിറങ്ങരയില്‍ താമസക്കാരനുമായ ശേഖര്‍ (50), കോതമംഗലം റ്റി.ബി കുന്ന് പാണാട്ട് വീട്ടില്‍ ജോയി (60 ) എന്നിവരെയും മാതാവിനേയുമാണ് കുറുപ്പംപടി പൊലിസ് അറസ്റ്റ് ചെയ്തത്. പെരുമ്പാവൂര്‍ പുല്ലുവഴി സ്വദേശിയായ പെണ്‍കുട്ടിയാണ് ക്രൂരമായ ലൈംഗിക പീഡനത്തിരയായത്. ദിവസങ്ങളായി കുട്ടിയെ ശ്രദ്ധിച്ചതില്‍ അസ്വഭാവികത തോന്നിയ ക്ലാസ് ടീച്ചര്‍ കുട്ടിയെ മാറ്റി നിര്‍ത്തി ചോദ്യം ചെയ്തതില്‍ നിന്നുമാണ് പീഡന വിവരം കഴിഞ്ഞദിവസം പുറത്തായത്. തുടര്‍ന്ന് ടീച്ചര്‍ ചൈല്‍ഡ്‌ലൈന്‍ പ്രവര്‍ത്തകരെ വിവരമറിയിക്കുകയും ചൈല്‍ഡ്‌ലൈന്‍ പ്രവര്‍ത്തകര്‍ കുറുപ്പംപടി പൊലിസിന് വിവരം നല്‍കുകയായിരുന്നു.
സ്റ്റേഷനിലെ വനിത ഓഫീസര്‍ കുട്ടിയുടെ മൊഴി രേഖപ്പെടുത്തി കേസ് രജിസ്റ്റര്‍ ചെയ്തു. പ്രതികള്‍ രണ്ടു പേരും കുട്ടിയുടെ മാതാവുമായി വഴിവിട്ട ബന്ധം പുലര്‍ത്തിയിരുന്നതായി പൊലിസ് പറഞ്ഞു. ഇതിനിടയിലാണ് കുട്ടിയെയും പിഡീപിച്ചത്.എന്നാല്‍ കുട്ടിയെ പീഡിപ്പിക്കുന്നത് മാതാവ് തടഞ്ഞിരുന്നില്ലെന്ന് പൊലിസ് പറഞ്ഞു. കുട്ടി എന്തെങ്കിലും എതിര്‍പ്പ് പ്രകടിപ്പിച്ചാല്‍ മാതാവ് മര്‍ദിക്കുകയും പട്ടിണിക്കിടുകയും ചെയ്തിരുന്നു.
കൂടാതെ കുട്ടിയെ പീഡിപ്പിച്ച കാര്യം പുറത്തുപറയുമെന്ന് ഭീഷണിപ്പെടുത്തി മാതാവ് ഇവരില്‍ നിന്ന് പണം വാങ്ങിയിരുന്നു. കുട്ടിയുടെ മാതാവിനെതിരെ കുട്ടികള്‍ക്കെതിരെയുള്ള ലൈംഗികാതിക്രമം തടയല്‍ നിയമം, ബാല നീതി നിയമം എന്നീ വകുപ്പുകള്‍ പ്രകാരം കേസെടുത്തിട്ടുണ്ട്. പ്രതികളെ ഇന്ന് കോടതിയില്‍ ഹാജരാക്കും. കുറുപ്പംപടി സി.ഐ, ജെ. കുര്യാക്കോസിന്റെ നേതൃത്വത്തില്‍ പ്രിന്‍സിപ്പില്‍ എസ്.ഐ പി.എം ഷമീര്‍, എസ്.ഐ സുരേഷ്, എ.എസ്.ഐ ജോയി, സീനിയര്‍ സിവില്‍ ഓഫീസര്‍ അനില്‍ വര്‍ഗീസ്, ഡബ്ലിയു.സി.പി.ഒ ബിന്ധു എന്നിവരടങ്ങുന്ന സംഘമാണ് പ്രതികളെ പിടികൂടിയത്.