പാലക്കാട്: കണ്‍മുന്നില്‍ വെച്ച് സ്‌കൂള്‍ വിദ്യാര്‍ഥികളെ കയറ്റാതെ പോയ ബസ് ഡ്രൈവറെ ജില്ലാ കലക്ടര്‍ പിടികൂടി. തുടര്‍ന്ന് ഡ്രൈവര്‍ക്ക് പിഴയിടുകയും ചെയ്തു. ജില്ലാ കലക്ടര്‍ പി മേരിക്കുട്ടി ഔദ്യോഗിക ആവശ്യത്തിന് ഒറ്റപ്പാലത്തേക്ക് പോവുന്ന വഴി കാവില്‍പ്പാട് വെച്ച് രാവിലെ 10 മണിക്കാണ് സംഭവം. എതിരെ വരുന്ന മലമ്പുഴ-പാലക്കാട് റൂട്ടില്‍ ഓടുന്ന വിഷ്ണുപ്രിയ ബസ്സില്‍ കയറാന്‍ റോഡ് മുറിച്ചു കടന്ന കുട്ടികളെ ജില്ലാ കലക്ടര്‍ വാഹനം നിറുത്തി സഹായിക്കുകയായിരുന്നു. എന്നാല്‍ ബസ് കയറാന്‍ വിദ്യാര്‍ഥികള്‍ റോഡ് മുറിച്ചു വരുന്നതറിഞ്ഞിട്ടും ഡ്രൈവര്‍ കുട്ടികളെ ബസ്സില്‍ കയറാന്‍ അനുവദിക്കാതെ ബസ് വിടുകയായിരുന്നു. തുടര്‍ന്ന് ജില്ലാ കലക്ടര്‍ ബസ്സിനെതിരെ നടപടി എടുക്കാന്‍ പൊലിസിന് നിര്‍ദ്ദേശം നല്‍കി.
സ്ഥലത്തെത്തിയ ട്രാഫിക്ക് പൊലിസ് ബസ്സ് പിടിച്ചിടുകയും ഡ്രൈവര്‍ ധോണി സ്വദേശിയായ അബു താഹിറിന് 1000 രൂപ പിഴയിടുകയും ചെയ്തു. വിദ്യാര്‍ഥികളെ കയറ്റാതെ പോവുന്ന ബസ് ഡ്രൈവര്‍മാര്‍ക്കെതിരെ കര്‍ശന നടപടി സ്വീകരിക്കുമെന്ന് ജില്ലാ കലക്ടര്‍ അറിയിച്ചു.