തളിപ്പറമ്പ് (കണ്ണൂര്‍): മഴൂര്‍ കരുവക്കുന്നില്‍ ആള്‍പെരുമാറ്റമില്ലാതെ കാടുപിടിച്ചു കിടക്കുന്ന പറമ്പില്‍ മനുഷ്യന്റെ തലയോട്ടി കണ്ടെത്തി. പറമ്പിനു സമീപത്തെ റബര്‍ തോട്ടത്തില്‍ ഇന്നലെ രാവിലെ ടാപ്പിങിനെത്തിയ തൊഴിലാളിയാണു തലയോട്ടി ആദ്യം കണ്ടത്. ഉടന്‍ പൊലിസിനെയും നാട്ടുകാരെയും വിവരമറിയിക്കുകയായിരുന്നു.
കരുവക്കുന്നില്‍ മിച്ചഭൂമിയില്‍പ്പെട്ട 20 ഏക്കര്‍ സ്ഥലം 12 വര്‍ഷം മുന്‍പാണു ഭൂരഹിതരായ പലര്‍ക്കായി പതിച്ചുനല്‍കിയത്. ഇതില്‍പെട്ട സ്ഥലത്താണു തലയോട്ടി കണ്ടത്. ഭൂമി ലഭിച്ചവര്‍ കൈകാര്യം ചെയ്യാത്തതിനാല്‍ ഇവിടം കാടുപിടിച്ച് കിടക്കുകയാണ്. എസ്.ഐ കെ.വി ലക്ഷ്മണന്റെ നേതൃത്വത്തില്‍ പൊലിസെത്തി നാട്ടുകാരുടെ സഹായത്തോടെ തിരച്ചില്‍ നടത്തിയെങ്കിലും മറ്റു ഭാഗങ്ങളൊന്നും കണ്ടെത്താനായില്ല.
തലയോട്ടിയും പരിസരത്തു നിന്നു ലഭിച്ച ഷര്‍ട്ടും പൊലിസ് കസ്റ്റഡിയിലെടുത്ത് ഫൊറന്‍സിക് പരിശോധനയ്ക്ക് അയച്ചു. തലയോട്ടിക്ക് ഏകദേശം അഞ്ചുവര്‍ഷത്തെ പഴക്കമുണ്ടാകുമെന്നാണു പ്രാഥമിക പരിശോധയില്‍ മനസിലാകുന്നതെന്നു പൊലിസ് പറഞ്ഞു. ഈ കാലയളവിലൊന്നും പ്രദേശത്തു നിന്ന് ആരെയും കാണാതായിട്ടില്ലെന്നാണു നാട്ടുകാര്‍ പറയുന്നത്. ഫൊറന്‍സിക് പരിശോധനാഫലം ലഭിച്ചതിനു ശേഷം തളിപ്പറമ്പ് സ്‌റ്റേഷന്‍ പരിധിയിലെ പഴയ കാണാതായ കേസുകള്‍ പരിശോധിക്കുമെന്നു പൊലിസ് അറിയിച്ചു.