റിയാദ്: രാജ്യത്ത് വ്യാപകമായി കൊണ്ടിരിക്കുന്ന കൊവിഡ് ബാധ തടയുന്നതിന്റെ ഭാഗമായി ആരോഗ്യ മന്ത്രാലയത്തിന് പൂര്‍ണ സഹായം നല്‍കി വിദ്യാഭ്യാസ മന്ത്രാലയം. 

യൂനിവേഴ്‌സിറ്റികള്‍ക്ക് കീഴിലെ ആശുപത്രികളും കെട്ടിടങ്ങളും വിട്ടു നല്‍കിയാണ് വിദ്യാഭ്യാസ മന്ത്രാലയം പൂര്‍ണ പിന്തുണ നല്‍കുന്നത്. രാജ്യത്തെ വിവിധ സര്‍വകലാശാലകള്‍ ഏത് അടിയന്തിര ഘട്ടത്തിലും ആരോഗ്യ മന്ത്രാലയത്തെ സഹായിക്കാനായി പദ്ധതികളും  തയാറാക്കിയിട്ടുണ്ട്. മുവ്വായിരത്തിലധികം ബെഡുകള്‍ സജ്ജീകരിച്ചതടക്കം വിവിധ മുന്‍കരുതലുകളാണ് സര്‍വകലാശാലകള്‍ സ്വീകരിച്ചത്.

     നിലവില്‍ രാജ്യത്തെ കോവിഡ് -19 വൈറസ് ബാധിതരുടെ എണ്ണം 1203 ആണ്. എന്നാല്‍ സര്‍വകലാശാലകള്‍ മുവ്വായിരത്തിലധികം ബെഡുകളാണ് സജ്ജീകരിച്ചിരിക്കുന്നത്. കൂടാതെ, ക്വാറന്റൈനിനായി  ഇരുപത് യൂനിവേഴ്‌സിറ്റികള്‍ തങ്ങളുടെ 77 ലധികം കെട്ടിടങ്ങളും വിട്ടുനല്‍കിയിട്ടുണ്ട്. 

     സഊദിയില്‍ ചികിത്സയിലുള്ള കൊവിഡ് ബാധിതരില്‍ 37 പേര്‍ പൂര്‍ണ മോചിതരായി. ഇന്നലെ സ്വദേശി പൗരന്‍ കൂടി മരണപ്പെട്ടതോടെ രാജ്യത്തെ കൊവിഡ് മരണം നാലായി ഉയര്‍ന്നിട്ടുണ്ട്. 

ഇതിനകം സഊദി ആരോഗ്യ മന്ത്രാലയം 51,000 വിപുലമായ ലബോറട്ടറി പരിശോധനകള്‍ നടത്തി. ജനസംഖ്യാ അനുപാതത്തില്‍ ബന്ധപ്പെടുത്തുമ്പോള്‍  ഏറ്റവും കൂടുതല്‍ ടെസ്റ്റുകള്‍ നടത്തുന്ന ലോകത്തിലെ മികച്ച 10 രാജ്യങ്ങളില്‍ ഏറ്റവും മുന്നിലാണ് സഊദി അറേബ്യായെന്നാണ് ഇത് വ്യക്തമാക്കുന്നതെന്ന് സഊദി ആരോഗ്യ മന്ത്രാലയ വക്താവ് ഡോ. മുഹമ്മദ് അല്‍ അബ്ദ് അല്‍ ആലി പറഞ്ഞു.