കാസര്‍കോട്: ജനറല്‍ ആശുപത്രിയില്‍ കൊറോണാ വാര്‍ഡില്‍ രോഗികള്‍ക്ക് ഭീതി പരത്തി ചുറ്റിത്തിരിഞ്ഞിരുന്ന പൂച്ചയെ പിടികൂടി പ്രത്യേകം നിരീക്ഷണത്തിലാക്കി. കാസര്‍കോട് ജനറല്‍ ആശുപത്രി വാര്‍ഡില്‍ അലഞ്ഞുതിരിഞ്ഞിരുന്ന രണ്ട് പൂച്ചകളെയും രണ്ട് കുഞ്ഞുങ്ങളെയുമാണ് പിടികൂടിയത്.

വെറ്ററിനറി സര്‍ജന്മാരായ ഡോ. ഫാബിന്‍ പൈലി, ഡോ. അശ്വിന്‍ എന്നിവരുടെ നേതൃത്വത്തില്‍ പട്ടിപിടുത്തക്കാരുടെ സഹായത്തോടെയാണ് ഇവയെ പിടികൂടിയത്. കൊവിഡ്- 19 പ്രതിരോധ വസ്ത്രങ്ങള്‍ ഉള്‍പ്പെടെ ധരിച്ചാണ് ഇവര്‍ പൂച്ചകളെ വലയിട്ട് പിടിച്ചത്. തുടര്‍ന്ന് കാസര്‍കോട് റെയില്‍വേ സ്റ്റേഷന്‍ റോഡിനു സമീപത്തുള്ള മൃഗസംരക്ഷണ വകുപ്പിന്റെ എ.ബി.സി കേന്ദ്രത്തിലേക്കു ഇവയെ മാറ്റി.

ജനറല്‍ ആശുപത്രിയില്‍ കൊവിഡ് ബാധിതരെ കിടത്തിയിരുന്ന ഐസൊലേഷന്‍ വാര്‍ഡിലാണ് പൂച്ച വിലസി നടന്നിരുന്നത്. എ.ബി.സി കേന്ദ്രത്തില്‍ കൊവിഡ്- 19 നിരീക്ഷണത്തില്‍ കഴിയുന്ന പൂച്ചകള്‍ക്ക് പാല്‍ ഉള്‍പ്പെടെയുള്ള മികച്ച ഭക്ഷണങ്ങളാണ് നല്‍കി വരുന്നത്. കേന്ദ്രത്തിലെ ബംഗാള്‍ സ്വദേശികളായ പട്ടി പിടുത്തക്കാരാണ് പൂച്ചകള്‍ക്ക് പരിചരണം നല്‍കുന്നത്. മൃഗ സംരക്ഷണ വകുപ്പിന്റെ നിര്‍ദേശപ്രകാരമാണ് നടപടി. ജനറല്‍ ആശുപത്രിയില്‍ കഴിഞ്ഞുവരുന്ന കൊവിഡ്-19 ബാധിതരായ ആളുകള്‍ സമൂഹ മാധ്യമങ്ങള്‍ വഴി പൂച്ചയുടെ വിളയാട്ടം പുറത്തുവിട്ടതോടെയാണ് സംഭവം വാര്‍ത്തയായത്.