നാദാപുരം: ഇയ്യങ്കോട്ട് സി.പി.എം-ബി.ജെ.പി സംഘര്‍ഷത്തെത്തുടര്‍ന്ന് വീടുകള്‍ക്ക് നേരെ ബോംബേറ്.
കഴിഞ്ഞദിവസം അര്‍ധരാത്രിയോടെയാണ് രണ്ടു സി.പി.എം പ്രവര്‍ത്തകരുടെയും ഒരു ബി.ജെ.പി പ്രവര്‍ത്തകന്റെയും വീടിന് നേരെ അക്രമമുണ്ടായത്.
ഇയ്യങ്കോട്ടെ സി.പി.എം പ്രവര്‍ത്തകന്‍ ചക്കാലക്കല്‍ ബാബുവിന്റെ വീടിനുനേരെയാണ് ആദ്യം ആക്രമണം നടന്നത്. വീടിനുമുന്‍പിലെ പറമ്പില്‍ നിന്നു ബാബുവിന്റെ വീട് ലക്ഷ്യമാക്കി എറിഞ്ഞ നാടന്‍ ബോംബ് വീട്ടുമുറ്റത്തെ മരത്തില്‍ത്തട്ടി നിലത്തു പതിക്കുകയായിരുന്നു. ഈ സമയം ബാബു പുറത്ത് ഇറങ്ങി നില്‍ക്കുകയായിരുന്നു.
ഇതിന് പിന്നാലെയാണ് സി.പി.എം ഇയ്യങ്കോട് ബ്രാഞ്ച് കമ്മിറ്റി അംഗം പനയുള്ളതില്‍ അശോകന്റെ വീടിനു നേരെ ഒരു സംഘം ഏറുപടക്കം എറിഞ്ഞത്. വീട്ടുവരാന്തയില്‍ വീണുപൊട്ടിയ പടക്കത്തിന്റെ സ്‌ഫോടനത്തില്‍ ടൈല്‍സിനു കേടുപാട് പറ്റി. രണ്ടുമാസത്തിനുള്ളില്‍ നാലാം തവണയാണ് ഇയാളുടെവീടിനു നേരെ ആക്രമണം നടക്കുന്നത്. രാത്രി പന്ത്രണ്ടരയോടെ ബി.ജെ.പി പ്രവര്‍ത്തകന്‍ കുറ്റിയില്‍ വാസുവിന്റെ വീടിന് നേരെനടന്ന കല്ലേറില്‍ വീടിനുമുന്‍വശത്തെ ഒരുജനലിന്റെ ചില്ലുതകര്‍ന്നു.
സ്ഥലത്തെത്തിയ നാദാപുരം പൊലിസ് കേസ് രജിസ്റ്റര്‍ ചെയ്തു. കഴിഞ്ഞ പഞ്ചായത്ത് തെരഞ്ഞെടുപ്പോടെയാണ് സ്ഥലത്ത് ബി.ജെ.പി-സി.പി.എം സംഘര്‍ഷം രൂപപ്പെട്ടത്.