മംഗളൂരു: ഉഡുപ്പി ജില്ലയിലെ പെര്‍ഡൂരില്‍ കാലിക്കച്ചവടക്കാരനായ ഹുസൈനബ്ബയെ (61) കൊലപ്പെടുത്തിയ കേസില്‍ മൂന്ന് ബജ്‌റംഗ്ദള്‍ പ്രവര്‍ത്തകര്‍ അറസ്റ്റില്‍. എച്ച്. പ്രസാദ് (32), ദീപക് (30), സുരേഷ് മെന്‍ഡന്‍ (27) എന്നിവരാണ് അറസ്റ്റിലായത്.
സംഭവവുമായി ബന്ധപ്പെട്ട് ഹരിയടുക്ക എസ്.ഐ ഡി.എന്‍ കുമാറിനെ ഉഡുപ്പി ജില്ലാ പൊലിസ് സൂപ്രണ്ട് കഴിഞ്ഞദിവസം സസ്‌പെന്‍ഡ് ചെയ്തിരുന്നു. കഴിഞ്ഞ ബുധനാഴ്ച പുലര്‍ച്ചെയാണ് ഹുസൈനബ്ബ കൊല്ലപ്പെട്ടത്. കാലിക്കടത്ത് നടക്കുന്നതായി വിവരം ലഭിച്ചതിനെ തുടര്‍ന്ന് പൊലിസ് സ്ഥലത്തെത്തിയിരുന്നു. പൊലിസിനെ കണ്ട് രക്ഷപ്പെടാന്‍ ശ്രമിക്കുന്നതിനിടെ ഹുസൈനബ്ബ പിടിയിലായിരുന്നു. തുടര്‍ന്ന് ഹുസൈനബ്ബയുടെ മൃതദേഹം കുന്നിന്‍മുകളില്‍നിന്ന് കണ്ടെത്തുകയായിരുന്നു. 35 വര്‍ഷമായി കന്നുകാലിക്കച്ചവടം നടത്തിവരുന്ന ഹുസൈനബ്ബയെ നേരത്തേ ബജ്‌റംഗ്ദള്‍ പ്രവര്‍ത്തകര്‍ മൂത്രം കുടിപ്പിച്ചതായി ആരോപണമുണ്ടായിരുന്നു.