കണ്ണൂര്‍: സമസ്ത കേരള ജംഇയ്യത്തുല്‍ മുഅല്ലിമിന്‍ സംഘടിപ്പിക്കുന്ന ജില്ലാ ഇസ്‌ലാമിക് കലാമേള ഏപ്രില്‍ രണ്ടുമുതല്‍ നാലു വരെ പാലക്കോട് ഖിദ്മത്തുല്‍ ഇസ്‌ലാം മദ്‌റസയില്‍ നടക്കും. 79 ഇനങ്ങളിലായി സബ് ജൂനിയര്‍, ജൂനിയര്‍, സീനിയര്‍, സൂപ്പര്‍ സീനിയര്‍ വിഭാഗങ്ങളിലായി മൂന്നു വേദിയില്‍ കലാപ്രതിഭകള്‍ മാറ്റുരയ്ക്കും. മ്ദറസാ അധ്യാപകര്‍ക്കായി പ്രത്യേക മത്സരവും ഉണ്ടാകും.
രണ്ടിനു രാവിലെ 9.30ന് പാലക്കോട് മഖാം സിയാറത്തിനു അബ്ദുറഹ്മാന്‍ ദാരിമി വേശാല നേതൃത്വം നല്‍കും. തുടര്‍ന്നു കെ.സി അബ്ബാസ് ഹാജി പതാക ഉയര്‍ത്തും. 10.30ന് റെയിഞ്ച് കോഓര്‍ഡിനേറ്റര്‍മാരുടെ സംഗമം കുടക് അബ്ദുറഹ്മാന്‍ മുസ്‌ലിയാര്‍ ഉദ്ഘാടനം ചെയ്യും. വൈകുന്നേരം നാലിന് മുട്ടം കക്കാടപ്പുറം റഹ്മാനിയ മദ്‌റസ കേന്ദ്രീകരിച്ച് നടക്കുന്ന വിളംബര ഘോഷയാത്ര പഴയങ്ങാടി പ്രിന്‍സിപ്പല്‍ എസ്.ഐ പി.ബി സജീവ് ഫ്‌ളാഗ്ഓഫ് ചെയ്യും.
കലാമേള വൈകുന്നേരം 6.30ന് സമസ്ത വിദ്യാഭ്യാസ ബോര്‍ഡ് പ്രസിഡന്റ് പി.കെ. പി അബ്ദുല്‍സലാം മുസ്‌ലിയാര്‍ ഉദ്ഘാടനം ചെയ്യും. മാണിയൂര്‍ അബ്ദുറഹ്മാന്‍ ഫൈസി അധ്യക്ഷനാവും. വി.കെ അബ്ദുല്‍ഖാദര്‍ മൗലവി, അബ്ദുറഹ്മാന്‍ കല്ലായി, വി.പി വമ്പന്‍, റഷീദ് കവ്വായി, അബൂബക്കര്‍ ഹുദവി മുണ്ടംപറമ്പ്, ബി. ഹംസ ഹാജി സംബന്ധിക്കും. എസ്.കെ ഹംസ ഹാജി, മാണിയൂര്‍ അഹ്മദ് മുസ്‌ലിയാര്‍ എന്നിവര്‍ മുഖ്യാതിഥിയാവും. തുടര്‍ന്നു സൂപ്പര്‍ സീനിയര്‍ ബുര്‍ദ മജ്‌ലിസ്.
മൂന്നിനു രാവിലെ ഒന്‍പതു മുതല്‍ കലാസാഹിത്യ മത്സരങ്ങള്‍. വൈകുന്നേരം ആറിന് സാംസ്‌കാരിക സന്ധ്യ പാണക്കാട് റഷീദലി ശിഹാബ് തങ്ങള്‍ ഉദ്ഘാടനം ചെയ്യും. കെ.പി.പി തങ്ങള്‍ അധ്യക്ഷനാകും. കണ്ണൂര്‍ സര്‍വകലാശാലാ വൈസ് ചാന്‍സലര്‍ ഡോ. ഖാദര്‍ മാങ്ങാട് മുഖ്യാതിഥിയാകും. തുടര്‍ന്നു മുഅല്ലിം ബുര്‍ദ മജ്‌ലിസ്. നാലിനു വൈകുന്നേരം ആറിന് സമാപന സമ്മേളനം സമസ്ത ജനറല്‍സെക്രട്ടറി പ്രൊഫ. കെ ആലിക്കുട്ടി മുസ്‌ലിയാര്‍ ഉദ്ഘാടനം ചെയ്യും. സമസ്ത സെക്രട്ടറി പി.പി ഉമര്‍ മുസ്‌ലിയാര്‍ ട്രോഫിയും കെ.കെ.പി അബ്ദുല്ല ഫൈസി സമ്മാനദാനവും ടി.എസ് ഇബ്രാഹിം മുസ്‌ലിയാര്‍ സര്‍ട്ടിഫിക്കറ്റ് വിതരണവും നിര്‍വഹിക്കും. അഹമ്മദ് തേര്‍ളായി, ബഷീര്‍ അസ്അദി, പി.ടി മുഹമ്മദ് തുടങ്ങിയവര്‍ പങ്കെടുക്കും.
ക്ഷേമനിധി സഹായവിതണം കാസര്‍കോട് ജില്ലാ പഞ്ചായത്ത് പ്രസിഡന്റ് എ.ജി.സി ബഷീര്‍ നിര്‍വഹിക്കും. കെ.ടി. അബ്ദുല്ലമൗലവി, മമ്മൂട്ടി വയനാട്, അന്‍സാരി തില്ലങ്കേരി, എ. ഉമര്‍കോയ തങ്ങള്‍ എന്നിവര്‍ സംബന്ധിക്കുമെന്നും ജില്ലാ ജനറല്‍സെക്രട്ടറി അബ്ദുസമദ് മുട്ടം, അബ്ദുല്‍ ലത്തീഫ് ഫൈസി, അബ്ദുല്‍സലാം ഇരിക്കൂര്‍, അബ്ദുല്‍ ലത്തീഫ് എടവച്ചാല്‍, നവാസ് ദാരിമി എന്നിവര്‍ വാര്‍ത്താസമ്മേളനത്തില്‍ അറിയിച്ചു.