കോട്ടയം: മൂന്നാറിലെ സര്‍ക്കാര്‍ ഭൂമി ദേവികുളം എം.എല്‍.എ എസ് രാജേന്ദ്രന്‍ അനധികൃത കൈയേറിയെന്ന് വ്യക്തമായിട്ടും നടപടി സ്വീകരിക്കാതിരുന്നത് ജനപ്രതിനിധിയായതിനാലാണെന്ന് മുന്‍ റവന്യു മന്ത്രി തിരുവഞ്ചൂര്‍ രാധാകൃഷ്ണന്‍.
എം.എല്‍.എ കൈയേറിയത് സര്‍ക്കാര്‍ ഭൂമിയാണെന്ന് മുന്‍പ് അദ്ദേഹം തന്നെ സമ്മതിച്ചിരുന്നതാണെന്നും തിരുവഞ്ചൂര്‍ വാര്‍ത്താസമ്മേളനത്തില്‍ വ്യക്തമാക്കി. യു.ഡി.എഫ് സര്‍ക്കാരിന്റെ കാലത്ത് മൂന്നാര്‍ കൈയേറ്റം ഒഴിപ്പിക്കാന്‍ ഒന്നും ചെയ്തില്ലെന്ന വി.എസിന്റെ പ്രസ്താവനക്ക് മറുപടി നല്‍കുകയായിരുന്നു അദ്ദേഹം. ഇതിനിടയിലാണ് എസ് രാജേന്ദ്രന്‍ എം.എല്‍.എയുടെ ഭൂമി കൈയേറ്റത്തെ കുറിച്ചുള്ള ചോദ്യത്തിന് മറുപടിയായി അദ്ദേഹം ഇങ്ങനെ പറഞ്ഞത്. മൂന്നാര്‍ വിഷയത്തില്‍ യു.ഡി.എഫ് സര്‍ക്കാര്‍ ഒന്നും ചെയ്തില്ലെന്ന വി.എസിന്റെ പ്രസ്താവന അടിസ്ഥാന രഹിതവും തെറ്റിദ്ധാരണ പരത്തുന്നതുമാണെന്നും തിരുവഞ്ചൂര്‍ പറഞ്ഞു. കാര്യങ്ങള്‍ പഠിക്കാതെയാണ് അദ്ദേഹം ആരോപണങ്ങള്‍ ഉന്നയിക്കുന്നത്. റവന്യു ഭൂമി ആരു കൈയേറിയാലും അത് കൈയേറ്റമാണെന്നും തിരുവഞ്ചൂര്‍ പറഞ്ഞു.