അടിമാലി: സംസ്ഥാനത്ത് പൊലിസിന്റെ കിരാതവാഴ്ച്ചയാണെന്നാരോപിച്ച് യൂത്ത് ലീഗിന്റെ നേതൃത്വത്തില്‍ അടിമാലി പൊലിസ് സ്റ്റേഷന് മുന്‍പില്‍ ജനകീയ വിചാരണ സംഘടിപ്പിച്ചു.
യൂത്ത് ലീഗ് സംസ്ഥാന സെക്രട്ടറി കെ.എസ് സിയാദ് ഉദ്ഘാടനം ചെയ്തു. എല്ലാം ശരിയാക്കാമെന്ന് പറഞ്ഞ് അധികാരത്തിലെത്തിയ ഇടതുസര്‍ക്കാര്‍ ഒന്നും ശരിയാക്കാത്ത അവസ്ഥയാണ് ഇപ്പോഴുള്ളതെന്ന് അദ്ദേഹം പറഞ്ഞു. സംസ്ഥാനത്ത് പൊലിസ് കിരാത വാഴ്ച്ച തുടരാനാണ് തീരുമാനമെങ്കില്‍ അതിനെ ശക്തമായ രീതിയില്‍ നേരിടുമെന്ന് യോഗത്തില്‍ സംസാരിച്ച നേതാക്കള്‍ മുന്നറിയിപ്പ് നല്‍കി.
കെവിന്റെ കൊലപാതകം, കസ്റ്റഡി മരണം, വിദേശ വനിതയുടെ കൊലപാതകം തുടങ്ങി വിവിധ വിഷയങ്ങള്‍ ഉയര്‍ത്തിപ്പിടിച്ചായിരുന്നു യൂത്ത് ലീഗിന്റെ നേതൃത്വത്തില്‍ സംസ്ഥാന വ്യാപകമായി 100 പൊലിസ് സ്‌റ്റേഷനുകള്‍ക്ക് മുന്‍പില്‍ ജനകീയ വിചാരണക്ക് രൂപം നല്‍കിയത്. പ്രതിഷേധത്തിന്റെ ഭാഗമായി യൂത്ത് ലീഗ് പ്രവര്‍ത്തകര്‍ അടിമാലി പൊലിസ് സ്‌റ്റേഷനിലേക്ക് മാര്‍ച്ച് സംഘടിപ്പിച്ചു. പ്രവര്‍ത്തകരെ സ്‌റ്റേഷനു മുന്‍പില്‍ പൊലിസ് തടഞ്ഞു.
യൂത്ത് ലീഗ് മണ്ഡലം പ്രസിഡന്റ് അബ്ദുല്‍ കലാം അധ്യക്ഷനായ സമരപരിപാടിയില്‍ യൂത്ത് ലീഗ് നേതാക്കളായ ഹനീഫ, അനസ് ഇബ്രാഹിം, മുഹമ്മദ് റാഫി സംസാരിച്ചു.