ആലത്തൂര്‍: പ്ലസ്ടു കംപ്യൂട്ടര്‍ സയന്‍സ് 85 ശതമാനം മാര്‍ക്കോടെ പാസായ എരിമയൂര്‍ ചാത്തങ്കോട്ടെ ശാലിനിക്ക് (18) ഐ.ടി.എന്‍ജിനീയറാവുകയെന്നതാണ് ജീവിതാഭിലാഷം.കൂലിപ്പണി ചെയ്ത് കഷ്ടപ്പെട്ട് വളര്‍ത്തുന്ന അച്ഛനും അമ്മക്കും വിശ്രമേകാന്‍ നല്ല ജോലി നേടണം. മൂന്ന് മാസം മുമ്പുവരെ അവളുടെ സ്വപ്നങ്ങള്‍ക്ക് നിറമേറെയായിരുന്നു. ഇപ്പോള്‍ ആസ്പത്രിയിലെ കിടക്കയില്‍ അവളുടെ സ്വപ്നങ്ങള്‍ കുടുങ്ങിക്കിടക്കുന്നു. പ്ലസ്ടു പരീക്ഷ എഴുതുന്ന സമയത്താണ് ശാലിനിക്ക് ശാരീരികാസ്വസ്ഥതകള്‍ പ്രകടമായത്. ആലത്തൂര്‍ താലൂക്കാസ്പത്രിയില്‍ നടത്തിയ പരിശോധനയില്‍ വൃക്കകള്‍ തകരാറിലാണെന്ന് കണ്ടെത്തി. കോഴിക്കോട് മെഡിക്കല്‍ കോളജില്‍ ഉടന്‍ പ്രവേശിപ്പിക്കാനായിരുന്നു ഡോക്ടര്‍മാരുടെ ഉപദേശം. രോഗ പീഡകളോട് മത്സരിച്ച് അവള്‍ പരീക്ഷകള്‍ എഴുതി തീര്‍ത്തു.പ ിന്നെ ഇന്നോളം ആസ്പത്രി വാസം തന്നെ. കോഴിക്കോട് മെഡിക്കല്‍ കോളജില്‍ പ്രവേശിപ്പിച്ച് മൂന്ന് ദിവസത്തിലൊരിക്കല്‍ ഡയാലിസിസ് നടത്തിവരികയാണ്.ചുമട്ടുതൊഴിലാളിയായ അച്ഛന്‍ നാരായണന് ആരോഗ്യപ്രശ്‌നം മൂലം സ്ഥിരം ജോലിക്കു പോകാന്‍ കഴിയുന്നില്ല. അമ്മ ഷര്‍മ്മിള കൂലിപ്പണി ചെയ്തിരുന്നു. മകളോടൊപ്പം ആസ്പത്രിയില്‍ നില്‍ക്കേണ്ടതിനാല്‍ ഇപ്പോള്‍ അവര്‍ക്കും ജോലിക്ക് പോകാന്‍ പറ്റാതായി. ശാലിനിയുടെ സഹോദരി മാലിനി ഈ വര്‍ഷം ഒമ്പത് എപ്ലസ് നേടിയാണ് എസ്.എസ്.എല്‍.സി.പാസായത്. ഇവളുടെ തുടര്‍ പഠനവും പ്രതിബന്ധം നേരിടുകയാണ്.
ഏഴ് സെന്റ് സ്ഥലവും രാജീവ് ഗാന്ധി ദശലക്ഷ ഭവന പദ്ധതിയില്‍ ലഭിച്ച ചെറിയ ഓട്ടുപുരയും മാത്രമാണ് കുടുംബത്തിന്റെ ആകെ സമ്പാദ്യം. മകള്‍ക്ക് വൃക്ക നല്‍കാന്‍ അമ്മ തയ്യാറാണ്. രക്തഗ്രൂപ്പ് പരിശോധനയില്‍ ഇത് ചെരുമെന്നാണ് കാണുന്നത്. പക്ഷേ ശസ്ത്രക്രിയയ്കും തുടര്‍ചികിത്സകും മരുന്നിനും ലക്ഷങ്ങള്‍ വേണ്ടിവരും. ചാത്തങ്കോട്ടെ ഇവരുടെ അയല്‍വാസികള്‍ ചികികിത്സ സഹായ നിധി സ്വരൂപിക്കാനുള്ള ശ്രമത്തിലാണ്. മുന്‍ ഗ്രാമ പഞ്ചായത്തംഗം അബ്ദുള്‍ റസാഖ് കണ്‍വീനറും വാര്‍ഡംഗം രമ്യ ശിവദാസ് കണ്‍വീനറുമായി സഹായ സമിതി രൂപവത്കരിച്ചു. ഫോണ്‍: 9846956080.