പാലക്കാട് : എണ്‍പത്തിയേഴാം വയസിലും ജീവിതം കൂട്ടിമുട്ടിക്കാന്‍ കോലുമിഠായി വിറ്റ് ഉപജീവനം നടത്തുകയാണ് പട്ടഞ്ചേരി പഞ്ചായത്തിലുളള കടുചിറയിലെ തങ്കമ്മമുത്തശി. പാലക്കാട് ജില്ലയിലെ ഉല്‍സവ പറമ്പുകളിലെല്ലാം ഈ മുത്തശി മിഠായിത്തട്ടുമായി കച്ചവടത്തിനുണ്ടാവും.പ്രായം കൂടിയെങ്കിലും ജീവിക്കാനുള്ള തത്രപ്പാടില്‍ അതൊന്നും വകവെക്കാതെ അവര്‍ ഇപ്പോഴും വേല,പൂര പറമ്പുകളിലേക്ക് കച്ചവടത്തിനായി എത്തുന്നു. ഭര്‍ത്താവ് ബാലകൃഷ്ണന്റെ മരണ ശേഷം കുടുംബത്തിന്റെ ചുമതല തങ്കമ്മക്കായി .ഇപ്പോള്‍ കച്ചവടസഹായത്തിനായി മകന്‍ നാരായണനും കൂട്ടുണ്ട്. ഉത്സവ പറമ്പില്‍ എത്തിയാല്‍ ഇവര്‍ രണ്ടുപേരും രണ്ടിടത്താണ് കച്ചവടത്തിനിരിക്കുന്നത്.
25-ം വയസിലാണ് തങ്കമ്മ സ്വന്തമായി മിഠായി കച്ചവടത്തിനിറങ്ങുന്നത് ആദ്യം ഭര്‍ത്താവിനോടൊപ്പമാണ് കച്ചവടത്തിന് പോയിരുന്നത്. പഞ്ചസാര കൊണ്ടുണ്ടാക്കിയ കോലുമിഠായി,കടലമിട്ടായി,ജൗ മിഠായി,വെല്ല മിഠായി, കച്ചായം,പരുപ്പ് വട,പണിയാരംഎന്നിങ്ങനെയുള്ള സാധനങ്ങളാണ് ഉത്സപ്പറമ്പുകളിലെ കച്ചവടത്തിനായി കൊണ്ടുപോകാറുള്ളത്.. അയ്യപ്പന്‍ വിളക്കുകള്‍ ആരംഭിക്കുന്നതോടെയാണ് ഇവരുടെ മിഠായി കച്ചവടം തുടങ്ങുന്നത്. പുതുശേരി വേലയില്‍ തുടങ്ങുന്ന ഉത്സവം അവസാനിക്കുന്നത് കണ്ണമ്പ്ര വേലയിലാണ്. ആറു മാസം ഇവര്‍ മിഠായി കച്ചവടവുമായി കഴിയും.പിന്നീട് മറ്റെന്തെങ്കിലും കൂലിപണിക്ക് പോകുകയാണ് പതിവ് .പാരമ്പര്യമായി ചെയ്തു വരുന്ന തൊഴിലായതിനാല്‍ ഉപേക്ഷിക്കാന്‍ മനസ് വരുന്നില്ലെന്നാണ് തങ്കമ്മ പറയുന്നത്. ഇതു വരെ കാര്യമായ അസുഖങ്ങളൊന്നും പിടിപെടാത്തതിനാല്‍ ഉത്സവ കാലം തുടങ്ങിയാല്‍ പിന്നെ മിഠായി കച്ചവടത്തിന് പോകാനുള്ള തത്രപ്പാടാണിവര്‍ക്കിപ്പോഴും.87വയസുവരെ പാരമ്പര്യ തൊഴില്‍ ചെയ്തു ജീവിച്ചു.
ഇനിമരിക്കുന്നതുവരെ ഈ തൊഴില്‍ ചെയ്തു ജീവിക്കണമെന്നാണ് തന്റെ ആഗ്രഹമെന്ന് തങ്കമ്മ പറയുന്നു. പുതിയ കാലത്തു് ഈ മിഠായികള്‍ക്ക് ആവശ്യക്കാര്‍ കുറവാണെങ്കിലും ഉത്സവ പറമ്പുകളിലെത്തുന്നവര്‍ ഇപ്പോഴും വാങ്ങിക്കുന്നുണ്ട്.അതു കൊണ്ടാണ് ഞങ്ങളെപ്പോലുള്ളവര്‍ ജീവിക്കുന്നത്.യന്ത്രസഹായമില്ലാതെയാണ് ഈ മിഠായി ഐറ്റങ്ങളെല്ലാം ഉണ്ടാക്കുന്നത്. ഇപ്പോള്‍ തമിഴ്‌നാട്ടില്‍ നിന്നും യന്ത്ര സഹായത്താല്‍ നിര്‍മ്മിച്ച ഇത്തരം മിഠായികള്‍ വരാറുണ്ടെങ്കിലും കൈകൊണ്ടുണ്ടാക്കുന്നവയ്ക്ക് തന്നെയാണ് ആവശ്യക്കാരെയൊന്നും അവര്‍ പറയുന്നു.