കൊപ്പം: പുലാമന്തോള്‍ പട്ടാമ്പി റോഡിന്റെ തകര്‍ച്ച വാഹനയാത്രികര്‍ക്ക് ദുരിതമാവുന്നു. പുലാമന്തോള്‍ ടോള്‍ബൂത്ത് മുതല്‍ വിളയൂര്‍ വരെ റോഡ് ഏറെക്കുറെ പൂര്‍ണമായും തകര്‍ന്നു. ഈ പാതയില്‍ നിരവധി വന്‍ കുഴികളാണ് രൂപപ്പെട്ടിരിക്കുന്നത്. കരിങ്ങനാട്, കൊപ്പം, ആമയൂര്‍ തുടങ്ങിയ സ്ഥലങ്ങളിലെല്ലാം റോഡ് തകര്‍ന്നിട്ടുണ്ട്. ഇരുചക്ര വാഹനങ്ങള്‍ കുഴികളില്‍ ചാടി നിയന്ത്രണം വിട്ട് അപകടങ്ങളും പതിവാണ്.
പെരുമ്പിലാവ് നിലമ്പൂര്‍ സംസ്ഥാന പാതയില്‍ വിളയൂര്‍ മുതല്‍ പട്ടാമ്പി വരെ ഒരു വര്‍ഷം മുന്‍പാണ് റബറൈസ് ചെയ്തത്. പക്ഷേ ഏറെ വൈകാതെ തന്നെ റോഡ് തകരുകയായിരുന്നു. നിര്‍മാണത്തില്‍ വന്‍ക്രമക്കേട് ആരോപിച്ച് വിജിലന്‍സ് അന്വേഷണവും നടന്നു.
പുലാമന്തോള്‍ ടോള്‍ ബൂത്തിന് സമീപം റോഡ് ഇല്ലാത്ത അവസ്ഥയാണ്. പ്രശ്‌നത്തിന് പരിഹാരം കാണാതെ പരസ്പരം ആരോപണങ്ങളുതിര്‍ക്കാനാണ് രാഷ്ട്രീയ പാര്‍ട്ടികളും ശ്രമിക്കുന്നത്.