ന്യൂഡല്‍ഹി: മുംബൈയിലുള്ള ജിന്ന ഹൗസ് പൊളിച്ചു മാറ്റണമെന്ന ബി.ജെ.പി എം.എല്‍.എയുടെ പ്രസ്താവനയ്ക്ക് മറുപടിയുമായി പാകിസ്താന്‍. ജിന്നാ ഹൗസിന്റെ ഉടമസ്ഥാവകാശം പാകിസ്താനാണ്. ഇന്ത്യ ഇക്കാര്യത്തെ ബഹുമാനത്തോടെ സമീപിക്കണമെന്നും പാകിസ്താന്‍ വിദേശകാര്യ മന്ത്രാലയം ആവശ്യപ്പെട്ടു.
പാകിസ്താനെ സംബന്ധിച്ച് ജിന്നാ ഹൗസ് ചരിത്രപ്രാധാന്യമുള്ള ഭൂസ്വത്താണ്. ഇക്കാര്യം ഇന്ത്യ ശ്രദ്ധിക്കണം. ഇത് ഉടനടി കൈമാറണമെന്നും പാകിസ്താന്‍ ആവശ്യപ്പെട്ടു. ബി.ജെ.പി എം.എല്‍.എ മംഗള്‍ പ്രഭാത് ലോധ ജിന്നാ ഹൗസ് പൊളിച്ചു മാറ്റണമെന്നാണ് ആവശ്യപ്പെട്ടിരുന്നു. വിഭജനത്തിനായുള്ള ഗുഢാലോചന നടന്നത് ഇവിടെ വച്ചാണെന്നാണ് അദ്ദേഹത്തിന്റെ വാദം. ഇതിന് പിന്നാലെയാണ് പ്രതികരണവുമായി പാകിസ്താന്‍ രംഗത്തെത്തുന്നത്. എന്നാല്‍ മംഗള്‍ പ്രഭാത് ലോധയുടെ വാദം അസംബന്ധമാണെന്ന് പാകിസ്താന്‍ പറഞ്ഞു. ഈ ചരിത്രഭൂമി സംരക്ഷിക്കാന്‍ ഇന്ത്യക്ക് ബാധ്യതയുണ്ട്. നേരത്തെ ഇന്ത്യ ഇത് കൈമാറാമെന്ന് പറഞ്ഞിരുന്നെങ്കിലും അതുണ്ടായില്ലെന്ന് പാക് വിദേശകാര്യ മന്ത്രാലയ വക്താവ് നഫീസ് സാക്കറിയ വ്യക്തമാക്കി.