അഹമ്മദാബാദ്: ഗുജറാത്തില്‍ പശുവിനെ കശാപ്പ് ചെയ്യുന്നവര്‍ക്ക് ജീവപര്യന്തം തടവ് ശിക്ഷ. ഗോവധത്തില്‍ 50,000 രൂപ പിഴയും ഒടുക്കേണ്ടി വരും. നിയമഭേദഗതിക്ക് ഗുജറാത്ത് നിയമസഭ അംഗീകാരം നല്‍കി. ഗോ സംരക്ഷണ നിയമത്തില്‍ ബി.ജെ.പി സര്‍ക്കാര്‍ ഭേദഗതി വരുത്തിയാണ് നിയമസഭയില്‍ പാസാക്കിയെടുത്തത്. പശുവിനെ ഇറച്ചിക്കായി കശാപ്പ് ചെയ്യുന്നതും വില്‍ക്കുന്നതും കയറ്റുമതി ചെയ്യുന്നതും പൂര്‍ണമായി നിരോധിക്കുകയും ചെയ്തു.
പശുക്കള്‍ക്കെതിരേയുള്ള അക്രമം 1954ലെ ഗുജറാത്ത് ആനിമല്‍ പ്രിസര്‍വേഷന്‍ ആക്ടിന്റെ കീഴിലായിരുന്നു ശിക്ഷ വിധിച്ചിരുന്നത്. 2011ല്‍ നരേന്ദ്ര മോഡി സര്‍ക്കാര്‍ ഇതില്‍ ഭേദഗതി കൊണ്ടുവന്ന് പശുവിനെ കൊല്ലുന്നതും ഇറച്ചി വില്‍ക്കുന്നതും കയറ്റുമതി ചെയ്യുന്നതും നിരോധിച്ചിരുന്നു. 2011ലെ ഭേദഗതി പ്രകാരം ഗോവധത്തിന് ഏഴ് വര്‍ഷം മുതല്‍ 10 വര്‍ഷം വരെയായിരുന്നു ശിക്ഷ. ഇത് വീണ്ടും ഭേദഗതി ചെയ്താണ് ജീവപര്യന്തം ജയില്‍ ശിക്ഷയും 50,000 രൂപ പിഴയുമാക്കി മാറ്റിയത്.
പശുക്കടത്തിന് 10 വര്‍ഷം ശിക്ഷയും നിയമത്തിലുണ്ട്. പശുക്കടത്തിന് ഉപയോഗിക്കുന്ന വാഹനം കണ്ടുകെട്ടുകയും ഒരു ലക്ഷം രൂപ വരെ പിഴയീടാക്കാനും വകുപ്പുണ്ട്. കേസ് ജാമ്യമില്ലാ വകുപ്പ് പ്രകാരമാക്കാനും ശ്രമം നടക്കുന്നുണ്ട്.