കാഞ്ഞാണി: കത്തുന്ന വേനലിലെ വാഹന പണിമുടക്ക് ദിവസം ഡ്രൈവേഴ്‌സ് ഉപയോഗശൂന്യമായി കിടന്നിരുന്ന കിണര്‍ വൃത്തിയാക്കി മാതൃകയായി. പെരിങ്ങോട്ടുക്കര സാരഥിസംഘടനയിലെ ഡ്രൈവേഴ്‌സാണ് താന്ന്യം പഞ്ചായത്തിലെ 12 ാം വാര്‍ഡില്‍ കെ.കെ മേനോന്‍ ഷെഡ് സെന്ററില്‍ കഴിഞ്ഞ 25 വര്‍ഷമായി ഉപയോഗിക്കാതെ കിടന്നിരുന്ന കല്‍ കിണര്‍ ചെളിയും മറ്റ് മാലിന്യങ്ങളും നീക്കം ചെയ്ത് വൃത്തിയാക്കിയത്.
സംഘടനയുടെ സെക്രട്ടറി സുനില്‍ പാറമ്പിലിന്റെ നേതൃത്വത്തിലുള്ള ഏഴ് അംഗ ഡ്രൈവര്‍മാരാണ് രാവിലെ മുതല്‍ തുടങ്ങിയ വൃത്തിയാക്കല്‍ യജ്ഞം നടത്തിയത്. ഒരു കാലഘട്ടത്തില്‍ സമീപത്തെ ജനങ്ങളുടെ കുടിവെള്ളത്തിന്റെ ഏക ആശ്രയം ഈ കിണര്‍ ആയിരുന്നു. 200 വര്‍ഷത്തോളം പഴക്കമുള്ള പഞ്ചായത്ത് കിണറായിരുന്നു ഇതെന്ന് വാര്‍ഡ് മെമ്പര്‍ മീന സുനില്‍ പറഞ്ഞു. പ്രധാന സെന്ററില്‍ നിലനില്‍ക്കുന്ന ഈ കിണര്‍ സ്‌പോണ്‍സര്‍മാരുടെ സഹായത്താല്‍ മോഡിയും ആഴവും കൂട്ടി ഫലപ്രദ്ധമായി പ്രയോജനപ്പെടുത്തുമെന്നും മെമ്പര്‍ പറഞ്ഞു.