പൊന്നാനി : പൊന്നാനിക്ക് സമീപം അത്താണിയില്‍ സ്പീക്കര്‍ പി ശ്രീരാമകൃഷ്ണന്റെ വാഹനത്തിനു നേരേയുണ്ടായ കല്ലേറില്‍ സ്‌കൂള്‍ അധ്യാപകന് പരുക്ക്. വ്യാഴാഴ്ച വൈകിട്ട് ആറിന് പൊന്നാനി അത്താണിയില്‍ വച്ചാണ് കല്ലേറുണ്ടായത്. സ്പീക്കറുടെ വാഹനത്തിന് പിറകില്‍ ബൈക്കില്‍ വരികയായിരുന്ന പെരുമ്പടപ്പ് പുത്തന്‍പള്ളിയിലെ കെ.എം.എം ഇംഗ്ലീഷ് മീഡിയം സ്‌കൂളിലെ പ്രിന്‍സിപ്പല്‍ പി.കെ ഫഹദിനാണ് കല്ലേറില്‍ പരുക്കേറ്റത്. സ്‌കൂളില്‍ നിന്നും തിരൂരിലെ വീട്ടിലേക്ക് പോവുകയായിരുന്നു ഇയാള്‍.
മാറഞ്ചേരിയില പൊതുപരിപാടി കഴിഞ്ഞ് മലപ്പുറത്തേക്ക് പോവുകയായിരുന്നു സ്പീക്കര്‍. പ്രദേശത്ത് ബി.ജെ.പി നേതാവ് ശോഭാ സുരേന്ദ്രന്റെ പ്രസംഗം കഴിഞ്ഞ ശേഷമാണ് കല്ലേറുണ്ടായത്. ആര്‍.എസ്.എസിന്റെ ശക്തി കേന്ദ്രമാണ് അത്താണി. സമീപത്തെ കടകളിലുള്ള സി.സി.ടി.വി ക്യാമറകളില്‍ പതിഞ്ഞ ദൃശ്യങ്ങള്‍ പൊലിസ് പരിശോധിച്ചെങ്കിലും കൃത്യമായ വിവരങ്ങള്‍ ലഭിച്ചിട്ടില്ല.
പ്രതിയെക്കുറിച്ച് ചില സൂചനകള്‍ ലഭിച്ചുവെന്നാണ് കേസ് അന്വേഷിക്കുന്ന പൊന്നാനി സി.ഐ നല്‍കുന്ന വിശദീകരണം.