റിയാദ്: കൊവിഡ് വ്യാപനത്തിന്റെ പശ്ചാത്തലത്തില്‍  വിപണി ഏറെ സങ്കീര്‍ണമായി തുടരുന്നതിനിടെ എണ്ണ വിതരണത്തില്‍  ആധിപത്യം ഉറപ്പിക്കാനുള്ള ശ്രമങ്ങള്‍ സഊദി  ശക്തമായി തുടരുന്നു. 

എണ്ണയുല്‍പാദന കാര്യത്തില്‍ റഷ്യയുമായി  ഇടഞ്ഞു നില്‍ക്കുന്ന സഊദി ഒരു ദിവസം  120 ലക്ഷം ബാരല്‍ എണ്ണ പുറത്തിറക്കി ചരിത്രം കുറിച്ചു. ബുധനാഴ്ചയാണ് സഊദി അരാംകോ പന്ത്രണ്ട് മില്യണ്‍ ബാരല്‍ വിപണിയിറക്കിയത്.   

ആഗോള എണ്ണവില നിയന്ത്രിക്കുന്നതില്‍ തര്‍ക്കം മൂര്‍ച്ഛിച്ചപ്പോള്‍  ഉല്‍പാദനം വര്‍ധിപ്പിക്കുമെന്ന് സഊദി നേരത്തെ തന്നെ മുന്നറിയിപ്പ് നല്‍കിയിരുന്നു.

      ഇത് പ്രകാരമാണ് കഴിഞ്ഞ ദിവസം രാജ്യത്തെ എണ്ണയുല്‍പാദനം അതിന്റെ ഏറ്റവും ഉയര്‍ന്ന നിലയില്‍ എത്തിച്ചതെന്ന് ലോകത്തെ ഏറ്റവും വലിയ എണ്ണക്കമ്പനിയായ സഊദി അരാംകോ അധികൃതരും സഊദി ഊര്‍ജ  മന്ത്രാലയം അധികൃതരും വ്യക്തമാക്കി.  ഇതു വരെയുള്ള സഊദിയുടെ പരമാവധി പ്രദിതിന എണ്ണയുല്‍പാദനം  11 ദശ ലക്ഷം ബാരലായിരുന്നു. 

      സഊദി തുറമുഖങ്ങളില്‍ നിന്ന് 18.8 ദശലക്ഷം ബാരല്‍ എണ്ണ കയറ്റിയ 15 ടാങ്കറുകള്‍ പുറപ്പെടുന്ന ഒരു ഹ്രസ്വ വിഡിയോയും കമ്പനി പുറത്തിറക്കി.  നേരത്തെ തന്നെ വിവിധ രാജ്യങ്ങളുമായി കൂടുതല്‍ എണ്ണവിതരണത്തിനും കയറ്റുമതിക്കും കരാറുകള്‍ ഉണ്ടാക്കിയതായും ലോകത്തെ വലിയ എണ്ണടാങ്കറുകള്‍ ഇതിനായി സജ്ജീകരിച്ചതായും അരാംകോ വ്യക്തമാക്കിയിരുന്നു.

       അതേസമയം, അരാംകോ ഉല്‍പാദനം   വര്‍ധിപ്പിച്ചതിനു പിന്നാലെ എണ്ണവിപണിയില്‍ ഉണ്ടാകുന്ന മാറ്റം എന്തായിരിക്കുമെന്ന കാത്തിരിപ്പിലാണ് ലോകം.  നിലവില്‍ വെസ്റ്റ് ടെക്‌സാസ് ഇന്റര്‍മീഡിയറ്റ് എണ്ണ ബാരലിന് (ഡബ്ല്യു. ടി .ഐ) 21.30 ഡോളറിലും ബ്രെന്റ് ക്രൂഡ് 26.20 ഡോളറിലുമാണ് വ്യാപാരം നടക്കുന്നത്. 

ഒരു മാസം മുന്‍പ് മാര്‍ച്ച് രണ്ടിന് ഡബ്ല്യു. ടി .ഐയ്ക്ക് 46.75 ഡോളറും ബ്രെന്റ് ക്രൂഡ് എണ്ണക്ക് 51.90 ഡോളറുമായിരുന്നു.