വൈക്കം: നാമക്കുഴിയിലെ യുവ കായികപ്രതിഭ വിദേശ പരിശീലനത്തിന് പോകാന്‍ പണമില്ലാതെ പ്രതിസന്ധിയില്‍. മേവെള്ളൂര്‍ വനിതാ സ്‌പോര്‍ട്‌സ് അക്കാദമിയിലെ ജോമോന്‍ ജേക്കബാണ് പ്രയാസം നേരിടുന്നത്. ജോമോന് അമേരിക്കയിലെ ഫ്‌ളോറിഡയിലേക്കാണ് വിദഗ്ധ പരിശീലനത്തിനുള്ള ക്ഷണം ലഭിച്ചിരിക്കുന്നത്. മൂന്നു ലക്ഷം രൂപയോളമാണ് ഇതിന് ചെലവു പ്രതീക്ഷിക്കുന്നത്. വനിതാ സ്‌പോര്‍ട്‌സ് അക്കാദമിയിലെ പരിശീലകനായ ജോമോന്‍ ജേക്കബ് ആറു വര്‍ഷമായി കുട്ടികള്‍ക്ക് സൗജന്യ പരിശീലനം നല്‍കി വരികയാണ്.
മുന്‍ കേരള സംസ്ഥാന അത്‌ലറ്റായിരുന്നു ഇദ്ദേഹം. കേരളത്തില്‍ നടന്ന ആറു സീനിയര്‍-ജൂനിയര്‍ വനിതാ ഫുട്‌ബോള്‍ സ്റ്റേറ്റ് ചാംപ്യന്‍ഷിപ്പുകളില്‍ മൂന്ന് ചാംപ്യന്‍ഷിപ്പും കരസ്ഥമാക്കിയത് ഇദ്ദേഹത്തിന്റെ കീഴില്‍ പരിശീലനം നടത്തിയ അക്കാദമിയിലെ കുട്ടികളാണ്. വെള്ളൂര്‍ കുഞ്ഞിരാമന്‍ മെമോറിയല്‍ സ്‌കൂളിലെ (കെ.എം.എച്ച്.എസ് ) കായികാധ്യപകന്‍ കൂടിയായ ഇദ്ദേഹം പ്രദേശത്തെ കുട്ടികളെ പരിശീലിപ്പിച്ചാണ് ഇത്രയധികം നേട്ടങ്ങള്‍ കരസ്ഥമാക്കിയത്.
അക്കാദമിയില്‍ സായിയുടെ കേരളത്തിലെ ആദ്യ ഫുട്‌ബോള്‍ എക്സ്റ്റന്‍ഷന്‍ സെന്ററും അനുവദിച്ചിട്ടുണ്ട്. അന്തര്‍ദേശീയ വനിതാ വോളിബോള്‍ താരങ്ങളായ നാമക്കുഴി സിസ്റ്റേഴ്‌സിന്റെ സഹോദരന്‍ കൂടിയായ ജോമോന്‍ വിദേശ പരിശീലനത്തിനായി സ്‌പോണ്‍സര്‍മാരെ തേടുകയാണ്. ഫോണ്‍: 8281489708, 7025108090.