രാമപുരം: ഭിന്നശേഷിക്കാരായ സ്‌കൂള്‍ കുട്ടികളെ കൊണ്ടുപോകുന്ന മിനിബസ് മദ്യപിച്ച് ഓടിച്ചതിന് ഡ്രൈവറെയും സഹായിയെയും വെളിയന്നൂരിന് സമീപത്തു വച്ച് പൊലിസ് അറസ്റ്റ് ചെയ്തു.
കൂത്താട്ടുകുളം ആശ്രയ സ്‌കൂള്‍ ഓഫ് മെന്റലി ഹാന്‍ഡിക്യാപ്‌സിലെ ഡ്രൈവര്‍ പൂവക്കുളം ചൈത്രം വീട്ടില്‍ വൈശാഖ് വിജയന്‍ (30), സഹായിയും സ്‌കൂളിന്റെ ട്രഷററുമായ വെളിയന്നൂര്‍ കണ്ടത്തില്‍ ജോണി കെ. ബേബി (40) എന്നിവനരെയാണ് രാമപുരം പൊലിസ് പിടികൂടിയത്.
ഇവര്‍ മദ്യലഹരിയിലാണെന്ന് സംശയം തോന്നിയ നാട്ടുകാര്‍ വാഹനം തടഞ്ഞു നിര്‍ത്തി പൊലിസില്‍ വിവരമറിയിക്കുകയായിരുന്നു. കുട്ടികളെ സ്‌കൂളില്‍ നിന്ന് വീട്ടിലേക്ക് കൊണ്ടുപോകുകയായിരുന്നു ഇവര്‍. കൂത്താട്ടുകുളത്തിന് സമീപം ഏതാനും ദിവസങ്ങള്‍ക്ക് മുന്‍പ് സ്‌കൂള്‍ വാഹനം നിയന്ത്രണംവിട്ട് മറിഞ്ഞ് രണ്ട് എല്‍.കെ.ജി വിദ്യാര്‍ഥികള്‍ മരിച്ചിരുന്നു.
രാമപുരം സബ് ഇന്‍സ്‌പെക്ടര്‍ കെ.കെ ലാലു, എ.എസ്.ഐ മോഹനന്‍ തുടങ്ങിവരുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.