ഗുരുവായൂര്‍: ഇരിങ്ങപ്പുറത്ത് നിന്നും വില്‍പ്പനക്കായി കൊണ്ടുവന്ന 1.2 കിലോ കഞ്ചാവ് പിടികൂടി. വാടാനപ്പള്ളി എക്‌സൈസ് സര്‍ക്കിള്‍ ഇന്‍സ്‌പെക്ടര്‍ക്ക് ലഭിച്ച രഹസ്യ വിവരത്തെ തുടര്‍ന്ന് നടത്തിയ പരിശോധനയിലാണ് കഞ്ചാവ് പിടികൂടിയത്.
വില്‍പ്പനക്കായി കഞ്ചാവു കൊണ്ടുവന്ന ചാവക്കാട് കടപ്പുറം ഇരട്ടപ്പുഴ ഓവാട്ട് വീട്ടില്‍ സുഭാഷ് ചന്ദ്രനെ (24) എക്‌സൈസ് സംഘം അറസ്റ്റു ചെയ്തത്. ഇന്നലെ ഉച്ചയ്ക്ക് ഒന്നരയോടെ കോട്ടപ്പടി മണിഗ്രാം റോഡില്‍ ഇയാള്‍ കഞ്ചാവ് വില്‍പ്പനയ്ക്കായി നില്‍ക്കുന്നതിനിടെയാണ് എക്‌സൈസ് സംഘത്തിന്റെ പിടിയിലായത്. വാടാനപ്പള്ളി എക്‌സൈസ് സര്‍ക്കിള്‍ ഇന്‍സ്‌പെക്ടര്‍ എസ്. കൃഷ്ണകുമാര്‍, പ്രിവന്റിംഗ് ഓഫിസര്‍ ടി.വി. അനീഷ്‌കുമാര്‍, സിവില്‍ എക്‌സ്സൈസ് ഓഫിസര്‍മാരായ വി.ബി അബ്ദുള്‍ ജബ്ബാര്‍, ജെയ്‌സണ്‍.പി.ദേവസ്യ, എ.എ.സുനില്‍ എന്നിവരടങ്ങിയ സംഘമാണ് പ്രതിയെ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.