ആലത്തിയൂര്‍: കുടുംബശ്രീയുടെ ന്യൂട്രിമിക്ക്‌സ് യൂനിറ്റ് തുടങ്ങുന്നതിന് ആരോഗ്യ ഉപകേന്ദ്രം ഒഴിയണമെന്നാവശ്യപ്പെട്ട് തൃപ്രങ്ങോട് പഞ്ചായത്ത് നല്‍കിയ കത്ത് ജില്ലാ മെഡിക്കല്‍ ഓഫിസര്‍ തീരുമാനത്തിനായി സര്‍ക്കാരിലേക്കയച്ചു. ജില്ലയില്‍ ഗുരുതര ആരോഗ്യ ഭീഷണി നിലനില്‍ക്കുന്നതിനിടെയാണ് ആലത്തിയൂര്‍ ആരോഗ്യ ഉപകേന്ദ്രം ഒഴിയണമെന്നാവശ്യപ്പട്ട് പഞ്ചായത്ത് കത്ത് നല്‍കിയത്.
ഇന്ന് അഞ്ചിന് മുന്‍പായി കെട്ടിടം ഒഴിയണമെന്നാണ് പഞ്ചായത്തിന്റെ അന്ത്യശാസനം. ഇതുണ്ടായില്ലെങ്കില്‍ തുടര്‍ന്നുള്ള കഷ്ടനഷ്ടങ്ങള്‍ക്ക് പി.എച്ച്.സിയിലെ മെഡിക്കല്‍ ഓഫിസര്‍ ഉത്തരവാദിയായിരിക്കുമെന്നും പഞ്ചായത്ത് പ്രസിഡന്റ് നല്‍കിയ കത്തില്‍ പറയുന്നു.
നാട്ടുകാരുടെ നിരന്തര ആവശ്യത്തെതുടര്‍ന്നാണ് വാടകക്കെട്ടിടത്തില്‍ പ്രവര്‍ത്തിച്ചിരുന്ന ഉപകേന്ദ്രം കഴിഞ്ഞ പഞ്ചായത്ത് ഭരണസമിതി ഒട്ടുംപുറം പാക്കേജില്‍ ഉള്‍പ്പെടുത്തി മാറ്റിസ്ഥാപിച്ചത്. പഞ്ചായത്തിന്റെ എസ്.സി ഫണ്ടുപയോഗിച്ച് പരപ്പേരിയില്‍ നിര്‍മിച്ച കെട്ടിടത്തിലാണ് ഇപ്പോള്‍ ഉപകേന്ദ്രം പ്രവര്‍ത്തിക്കുന്നത്. നിലവിലെ സാഹചര്യത്തില്‍ ജനങ്ങളുടെ ആരോഗ്യത്തിനാണ് പരിഗണന നല്‍കുന്നതെന്നും അതിനാലാണ് കത്ത് സര്‍ക്കാരിലേക്ക് കൈമാറുന്നതെന്നും ജില്ലാ മെഡിക്കല്‍ ഓഫിസര്‍ ഡോ. സക്കീന പറഞ്ഞു.
ഈ വിഷയത്തില്‍ രമ്യമായ പരിഹാരമാണ് പ്രതീക്ഷിക്കുന്നതെന്നും പഞ്ചായത്തുമായി തര്‍ക്കത്തിനില്ലെന്നും കാര്യങ്ങള്‍ സര്‍ക്കാര്‍ തീരുമാനിക്കുകയാണ് വേണ്ടതെന്നും അവര്‍ പറഞ്ഞു. അതേസമയം ഇരുപത് വര്‍ഷമായി നല്ലനിലയില്‍ പ്രവര്‍ത്തിക്കുന്ന കുടുംബശ്രീയുടെ നൂട്രിമിക്‌സ് യൂനിറ്റിനെ സംരക്ഷിക്കേണ്ട ബാധ്യത പഞ്ചായത്തിനുണ്ടെന്നും പഞ്ചായത്തിന്റെ അധികാര പരിധിയില്‍ വരുന്ന സ്ഥാപനങ്ങളില്‍ പഞ്ചായത്ത് തീരുമാനമെടുക്കുമെന്നും തൃപ്രങ്ങോട് പഞ്ചായത്ത് പ്രസിഡന്റ് കുമാരന്‍ പറഞ്ഞു.
കുടുംബശ്രീക്ക് യൂനിറ്റ് തുടങ്ങാന്‍ സൗകര്യമുള്ള കെട്ടിടം വാടകക്ക് ലഭ്യമല്ലാത്തതിനാലാണ് ആരോഗ്യ ഉപകേന്ദ്രം ഒഴിപ്പിക്കുന്നതിന് കത്ത് നല്‍കിയതെന്നും അദ്ദേഹം പറഞ്ഞു.