തിരൂര്‍: താനൂര്‍-തിരൂര്‍ തീരദേശങ്ങളില്‍ ശാശ്വത സമാധാനത്തിനു ലീഗ്-സി.പി.എം പാര്‍ട്ടികളുടെ ഭാഗത്തുനിന്ന് ആത്മാര്‍ഥ ശ്രമം. അക്രമങ്ങളില്‍ ഇരു പാര്‍ട്ടി പ്രവര്‍ത്തകര്‍ക്കും ഗുരുതര ശാരീരിക പ്രശ്‌നങ്ങളും ഭവന നഷ്ടവും സംഭവിക്കുന്ന പശ്ചാത്തലത്തിലാണ് സമാധാനത്തിനു പാര്‍ട്ടി നേതൃത്വങ്ങള്‍ തന്നെ മുന്‍കൈയെടുക്കുന്നത്.
സി.പി.എം-ലീഗ് സംസ്ഥാന നേതൃത്വം നടത്തിയ സമവായ ചര്‍ച്ചയ്ക്കു ശേഷം തിരൂര്‍ കേന്ദ്രീകരിച്ചു സി.പി.എമ്മും മുസ്‌ലിം ലീഗും പ്രമുഖ നേതാക്കളുടെ സാന്നിധ്യത്തില്‍ ഉഭയകക്ഷി ചര്‍ച്ചയും നടത്തി. ഈ ചര്‍ച്ചയുടെ അടിസ്ഥാനത്തിലാണ് തീരദേശത്തെ നേതൃത്വവും തമ്മില്‍ പരസ്പര ധാരണയിലെത്തിയത്. വ്യക്തിപരമായത് ഉള്‍പ്പെടെയുള്ള അനാവശ്യ വിഷയങ്ങള്‍ രാഷ്ട്രീയവല്‍ക്കരിക്കരുതെന്നും സമാധാനാന്തരീക്ഷം ഉറപ്പുവരുത്താന്‍ പരസ്പരം പ്രകോപനങ്ങളുണ്ടാക്കാതെയും വിട്ടുവീഴ്ച ചെയ്തും മുന്നോട്ടുപോകണമെന്നുമാണ് തീരുമാനം.
ഇതിന്റെ ഭാഗമായി തീരദേശത്ത് സമാധാനാന്തരീക്ഷം നിലനിര്‍ത്താനുള്ള മുന്‍കരുതല്‍ നടപടികള്‍ തുടങ്ങി. ഇരു പാര്‍ട്ടികളിലെയും പ്രവര്‍ത്തകര്‍ക്ക് ഇതുസംബന്ധിച്ചു കര്‍ശന നിര്‍ദേശമാണ് നേത്യത്വം നല്‍കിയിരിക്കുന്നത്.
മുന്നറിയിപ്പ് ലംഘിച്ച് പ്രശ്‌നങ്ങളുണ്ടാക്കുന്നവര്‍ക്കെതിരേ കര്‍ശന നടപടിയെടുക്കാനാണ് ഒറ്റക്കെട്ടായ തീരുമാനം. റമദാനില്‍പോലും കൂട്ടായി അരയന്‍ കടപ്പുറത്ത് സി.പി.എം-ലീഗ് സംഘര്‍ഷമുണ്ടാകുകയും ഇരു പാര്‍ട്ടി പ്രവര്‍ത്തകര്‍ക്കും വെട്ടേല്‍ക്കുകയും തുടര്‍ന്നു വീടുകള്‍ തകര്‍ക്കപ്പെടുകയും ചെയ്തിരുന്നു.
നിരന്തരം രാഷ്ട്രീയ സംഘര്‍ഷങ്ങളുണ്ടാകുകയും പരുക്കേല്‍ക്കപ്പെടുന്നവരുടെ ചികിത്സയ്ക്കായി ലക്ഷങ്ങള്‍ ചെലവു വരികയും തീരദേശ കുടുംബങ്ങളിലെ പെണ്‍കുട്ടികളുടെ വിവാഹം മുടങ്ങുകയും സ്ഥലം വില്‍പന സാധ്യമല്ലാതാകുകയും ചെയ്തതോടെ ദുരിതത്തിലായ മത്സ്യത്തൊഴിലാളികളുടെ പ്രയാസങ്ങള്‍കൂടി കണക്കിലെടുത്താണ് സമാധാന ശ്രമം.
പാര്‍ട്ടികളുടെ പരസ്പര ധാരണയോടെയുള്ള സമാധാന ശ്രമങ്ങള്‍ക്കു ജനപ്രതിനിധികളുടെയും പൊലിസിന്റെയും പൊതുജനങ്ങളുടെയും പൂര്‍ണ പിന്തുണയുമുണ്ട്.