മലപ്പുറം: നിപാ വൈറസ് ബാധയുടെ പശ്ചാത്തലത്തില്‍ മലപ്പുറത്തെ ജില്ലാ ആര്‍.ടി ഓഫിസിലെയും തിരൂരങ്ങാടി സബ് ആര്‍.ടി ഓഫിസിലെയും പ്രവര്‍ത്തനം ഭാഗികമായി നിര്‍ത്തി. എട്ടു വരെയാണ് പ്രവര്‍ത്തനം നിര്‍ത്തിയത്. രണ്ടാം ശനിയും ഞായറും ഉള്‍പ്പെടെയുള്ള അവധി ദിവസങ്ങള്‍ക്കു ശേഷം 11നാണ് ഇനി ഓഫിസ് സേവനങ്ങള്‍ പൂര്‍ണമായി ലഭ്യമാകുക.
ഡ്രൈവിങ് ടെസ്റ്റ്, ലേണിങ് ടെസ്റ്റ്, പുറത്തെ കൗണ്ടറുകള്‍, ഫാസ്റ്റ് ട്രാക്ക് കൗണ്ടര്‍ എന്നിവ ഈ ദിവസങ്ങളില്‍ ഉണ്ടാകില്ല. ഓഫിസ് പ്രവര്‍ത്തനം പതിവുപോലെ ഉണ്ടാകും.
കോഴിക്കോട് ജില്ലയിലെ ആര്‍.ടി ഓഫിസുകളില്‍ സേവനങ്ങള്‍ നിയന്ത്രിച്ചതോടെ അവിടെനിന്നുള്ള അപേക്ഷകര്‍ മലപ്പുറത്തേക്കു വന്നിരുന്നു. ഇതുമൂലം കഴിഞ്ഞ ദിവസം ജില്ലയിലെ സബ് ആര്‍.ടി ഓഫിസുകളിലും ജില്ലാ ഓഫിസിലും കനത്ത തിരക്കാണ് അനുഭവപ്പെട്ടത്.
ജനങ്ങളുടെ പരസ്പര സമ്പര്‍ക്കം പരമാവധി കുറയ്ക്കുന്നതിന്റെ ഭാഗമായാണ് നടപടി. മലപ്പുറത്തും തിരൂരങ്ങാടിയിലുമാണ് പ്രവര്‍ത്തനം ഭാഗികമായി നിര്‍ത്തിയതെന്ന് ആര്‍.ടി.ഒ മണി പറഞ്ഞു. മറ്റു സബ് ആര്‍.ടി ഓഫിസുകള്‍ പതിവുപോലെ പ്രവര്‍ത്തിക്കും.