തുറവൂര്‍: പ്ലാവും മാവും പേരയും ചാമ്പയും ഇടതൂര്‍ന്ന വളര്‍ന്നു നില്‍ക്കുന്ന സ്‌കൂള്‍ മുറ്റം . കുട്ടികള്‍ക്ക് വായുവും തണലും തണുപ്പും നല്‍കുന്ന ഫലവൃക്ഷത്തോട്ടമാണ് തുറവൂര്‍ ടി.ഡി.എച്ച്.എസില്‍ ഒരുങ്ങുന്നത്. ഇതിനായി പരിസ്ഥിതി ദിനത്തില്‍ 50 വൃക്ഷത്തൈകളാണ് നട്ടുവളര്‍ത്തുന്നത്.
1964ലെ പത്താം ക്ലാസ് ബാച്ചില്‍പ്പെട്ട പൂര്‍വ വിദ്യാര്‍ഥികളാണ് പദ്ധതിയുമായി മുന്നോട്ട് വന്നത്. അന്‍പതിനായിരം രൂപയാണ് 42 പേരുങ്ങുന്ന കൂട്ടായ്മ നീക്കിവച്ചത്. തൈകളുടെ സംരക്ഷണത്തിനായി 50 ട്രീ ഗാര്‍ഡുകള്‍ സ്‌കൂളുകള്‍ എത്തിച്ചു. കുട്ടികളുടെ പ്രത്യേക സംഘമാണ് വൃക്ഷത്തൈകളുടെ പരിപാലനം നടത്തുന്നത്. പരിസ്ഥിതി ദിനത്തില്‍ എ.എം ആരിഫ് എം.എല്‍.എ പദ്ധതിയുടെ ഉദ്ഘാടനം നിര്‍വഹിക്കും.