ചേവായൂര്‍: മെഡിക്കല്‍ കോളജ് ആശുപത്രിയില്‍ ജീവനക്കാരുടെ കുറവ് കാരണം വാര്‍ഡുകളുടെ എണ്ണം കുറച്ചു. മെഡിസിന്‍ വിഭാഗം വാര്‍ഡുകളാണ് പകുതിയിലേറെ കുറച്ചത്. നിപാ രോഗത്തിന് പ്രത്യേകം തയാറാക്കിയ പനി വാര്‍ഡിലേക്ക് കൂടുതല്‍ നഴ്‌സുമാരെയും ജീവനക്കാരെയും നിയോഗിച്ചതോടെയാണ് വാര്‍ഡുകളില്‍ ജീവനക്കാരുടെ കുറവുണ്ടായത്.
ആറ് യൂനിറ്റുകളും എട്ട് വാര്‍ഡുകളുമാണ് മെഡിസിന്‍ വിഭാഗത്തിനായി ഇവിടെയുള്ളത്. എട്ട് വാര്‍ഡുകള്‍ മൂന്നെണ്ണമായാണ് ഇപ്പോള്‍ കുറച്ചിരിക്കുന്നത്. മെഡിസിന്‍ വിഭാഗത്തില്‍നിന്ന് കൂടാതെ മറ്റ് വിഭാഗങ്ങളില്‍ നിന്നും നിരവധി ജീവനക്കാരെയാണ് പനി വാര്‍ഡിലേക്ക് നിയോഗിച്ചത്.
പനിയുമായെത്തുന്ന രോഗിയോടൊപ്പം കൂട്ടിരിപ്പുകാരെയും സഹായികളെയും അനുവദിക്കുന്നില്ല. ഓ.പി ടിക്കറ്റ് എടുക്കുന്നത് മുതല്‍ പേര് രജിസ്റ്റര്‍ ചെയ്യുന്നതും രോഗിക്കാവശ്യമായ പരിശോധനകള്‍ നടത്തികൊടുക്കുന്നതുമെല്ലാം ആശുപത്രി ജീവനക്കാരാണ്. അതുകൊണ്ടാണ് ഈ വിഭാഗത്തിലേക്ക് കൂടുതല്‍ ജീവനക്കാരെ ആവശ്യമായി വന്നത്. നിലവില്‍ കുറഞ്ഞ ജീവനക്കാരുമായി ഇഴഞ്ഞു നീങ്ങിയിരുന്ന പല വിഭാഗത്തിലും ഇതോടെ ജീവനക്കാരുടെ ക്ഷാമം രൂക്ഷമായി.
വാര്‍ഡുകളില്‍ രോഗികള്‍ ഗണ്യമായി കുറഞ്ഞത് കൊണ്ടാണ് വാര്‍ഡുകള്‍ കുറക്കാന്‍ സാധിച്ചത്. സ്ഥിതി ശാന്തമാവുകയും രോഗികള്‍ ആശുപത്രിയിലെത്താന്‍ തുടങ്ങുകയും ചെയ്താല്‍ ജീവനക്കാരുടെ കുറവ് ആശുപത്രി പ്രവര്‍ത്തനത്തെ പ്രതിസന്ധിയിലാക്കും.