തിരുവനന്തപുരം: ബി.ജെ.പി സംസ്ഥാന പ്രസിഡന്റ് കെ.സുരേന്ദ്രന്റെ യാത്ര വിവാദത്തില്‍. കെ.സുരേന്ദ്രന്റെ യാത്രയെ മന്ത്രി കടകംപള്ളി സുരേന്ദ്രന്‍ രൂക്ഷമായി വിമര്‍ശിച്ചു. സംഭവത്തില്‍ എ.ഐ.വൈ.എഫ് തിരുവനന്തപുരം ജില്ലാ കമ്മിറ്റി മുഖ്യമന്ത്രിക്കും ഡി.ജി.പിക്കും പരാതി നല്‍കി.
ലോക്ക് ഡൗണ്‍ ലംഘിച്ചുകൊണ്ട് കോഴിക്കോട് നിന്ന് തിരുവനന്തപുരത്തേക്കായിരുന്നു കെ. സുരേന്ദ്രന്റെ കാര്‍ യാത്ര. ഡി.ജി.പിയുടെ അനുമതിയോടെയാണ് യാത്ര നടത്തിയതെന്നാണ് കെ.സുരേന്ദ്രന്‍ പറഞ്ഞത്. എന്നാല്‍ സേവാ ഭാരതിയുടെ പേരില്‍ സംഘടിപ്പിച്ച വാഹന പാസ് ഉപയോഗിച്ചായിരുന്നു സുരേന്ദ്രന്റെ യാത്ര എന്നാണ് സപെഷ്യല്‍ ബ്രാഞ്ചിന് ലഭിച്ച വിവരം.
കെ.സുരേന്ദ്രന്റെ യാത്രയെ വിമര്‍ശിച്ച മന്ത്രി കടകംപള്ളി, അന്ധമായ രാഷ്ട്രീയം കളിക്കുന്ന കെ. സുരേന്ദ്രനൊക്കെ എന്തും ആകാമല്ലോ എന്നും കര്‍ണാടകത്തിന്റെ നടപടി ചോദ്യം ചെയ്യാന്‍ പോലും ഇവിടത്തെ ബി.ജെ.പിക്കാര്‍ തയാറല്ലെന്നും പറഞ്ഞു. കേരളത്തിലെ ജനങ്ങളോട് ബി.ജെ.പിക്ക് പ്രതിബദ്ധതയില്ല. കര്‍ണാടകത്തിലെ ബി.ജെ.പിക്കാരനായ മുഖ്യമന്ത്രി ചെയ്യുന്ന അധാര്‍മികതയ്‌ക്കെതിരെ ഒരക്ഷരം പോലും അവര്‍ മിണ്ടുന്നില്ല. കര്‍ണാടകയുമായി ബന്ധപ്പെട്ട അതിര്‍ത്തി പ്രശ്‌നത്തില്‍ വിലകുറഞ്ഞ രാഷ്ടീയം കളിക്കുകയാണ് സംസ്ഥാന ബി.ജെ.പിക്കാര്‍ ചെയ്യുന്നതെന്ന് മന്ത്രി കടകംപള്ളി ആരോപിച്ചു.
ലോക്ക് ഡൗണ്‍ പ്രഖ്യാപിക്കുമ്പോള്‍ കോഴിക്കോട്ടെ വീട്ടിലായിരുന്ന സുരേന്ദ്രന്‍ കഴിഞ്ഞ ദിവസം തലസ്ഥാനത്തെത്തി വാര്‍ത്താ സമ്മേളനം നടത്തിയിരുന്നു. കര്‍ണാടക അതിര്‍ത്തി അടച്ച സംഭവത്തില്‍ കേരള സര്‍ക്കാരിനെ കുറ്റപ്പെടുത്താനായിരുന്നു സുരേന്ദ്രന്റെ വാര്‍ത്താ സമ്മേളനം.