പൊന്നാനി :ലക്ഷങ്ങള്‍ മുന്‍കൂറായി വാങ്ങി വീടുകള്‍ പണയത്തിന് നല്‍കാമെന്ന് പറഞ്ഞ് കോടികളുടെ തട്ടിപ്പ് നടത്തിയ സംഭവത്തില്‍ പണം നഷ്ടപ്പെട്ടവര്‍ പ്രതിഷേധവുമായി രംഗത്ത് .
കോടികള്‍ കൈക്കലാക്കി മുങ്ങിയ വളവിലെ ചക്കരമാക്കല്‍ മുഹമ്മദിന്റെ വീടിന് മുന്നിലെ സ്ത്രീകളും കുട്ടികളും പുരുഷന്മാരും അടങ്ങുന്ന സംഘം മണിക്കൂറുകളോളം അടുപ്പ് കൂട്ടി പ്രതിഷേധിച്ചത് .പണം നഷ്ടപ്പെട്ടവര്‍ ഇന്നലെ വൈകുന്നേരത്തോടെ മുദ്രാവാക്യങ്ങളും മുഴക്കിയാണ് വീട്ടിലെത്തിയത് .നഇതേസമയം വീട്ടില്‍ സ്ത്രീകള്‍ മാത്രമാണ് ഉണ്ടായിരുന്നത് .തുടര്‍ന്ന് പണം നഷ്ടപ്പെട്ടവര്‍ പണം ലഭിച്ചാലെ തിരിച്ചുപോകൂ എന്ന് പ്രഖ്യാപിച്ചു .വീടിന്റെ മുന്നില്‍ തന്നെ അടുപ്പ് കൂട്ടി ചായ തിളപ്പിക്കുകയും ചെയ്തു .
ഒടുവില്‍ പൊന്നാനി എസ് ഐ സ്ഥലത്ത് എത്തി പ്രതിഷേധക്കാരെ അനുനയിപ്പിച്ചു .പണം നഷ്ടപ്പെട്ട വിഷയത്തില്‍ അന്വേഷണം പുരോഗമിക്കുകയാണെന്നും കോടികളുമായി മുങ്ങിയ മുഹമ്മദിനെ ഉടന്‍ പിടികൂടുമെന്നും പൊലിസ് നല്‍കിയ ഉറപ്പിലാണ് പ്രതിഷേധക്കാര്‍ പിരിഞ്ഞുപോയത്. 25 ഓളം ആളുകളാണ് ഇന്നലത്തെ സമരത്തില്‍ പങ്കെടുത്തത്.