കൊച്ചി: അവധിയെടുത്ത് വിദേശത്ത് പോയ ജീവനക്കാരന്റെ അവധി റദ്ദാക്കിയ കെ.എസ്.ആര്‍.ടി.സി നടപടി ഹൈക്കോടതി ശരിവച്ചു. ഹരജിക്കാരന്‍ 45 ദിവസത്തിനകം സര്‍വീസില്‍ തിരികെ പ്രവേശിക്കണമെന്ന് സിംഗിള്‍ബഞ്ച് ഉത്തരവിട്ടു.

വേതനരഹിതമായി അവധിയെടുക്കുന്നത് തടഞ്ഞ കെ.എസ്.ആര്‍.ടി.സിയുടെ നടപടി ചോദ്യം ചെയ്ത് ഗള്‍ഫില്‍ പോയ റിസര്‍വ് കണ്ടക്ടര്‍ പാലക്കാട് പട്ടാമ്പി സ്വദേശി അന്‍വര്‍ സാദത്ത് സമര്‍പ്പിച്ച ഹരജിയാണ് തള്ളിയത്. സര്‍വീസിലുണ്ടായിരുന്ന പിതാവ് മരിച്ചതിനെ തുടര്‍ന്നാണ് തനിക്ക് ജോലി ലഭിച്ചത്.

2007 മാര്‍ച്ച് 28 മുതല്‍ 2012 മാര്‍ച്ച് 27 വരെ ശമ്പളമില്ലാതെ അവധിയെടുക്കുകയും പിന്നീട് 2022 വരെയും അവധി ലഭിച്ചു. മെയില്‍ നാട്ടിലെത്തിയപ്പോള്‍ കെ.എസ്.ആര്‍.ടി.സി നോട്ടീസ് ലഭിച്ചു. അവധി റദ്ദാക്കുകയാണെന്നും ഈ മാസം 10നകം ജോലിക്ക് ഹാജരാവാനും ആയിരുന്നു നിര്‍ദേശം. ഇത് നിയമവിരുദ്ധമാണെന്നു ഹരജിക്കാരന്‍ വാദിച്ചു.

ശമ്പളമോ മറ്റു ആനുകൂല്യങ്ങളോ കൈപ്പറ്റിയിട്ടില്ല. അവധിയുടെ ഉറപ്പിലാണ് ഗള്‍ഫില്‍ പോയത്. അത് ഒഴിവാക്കാനാവില്ലെന്നും ഹരജിക്കാരന്‍ വാദിച്ചു. എന്നാല്‍ ജീവനക്കാരുടെ ലഭ്യതക്കുറവ് മൂലം നിരവധി സര്‍വീസുകള്‍ റദ്ദാക്കേണ്ടിവരുന്നതായും സാമ്പത്തിക നഷ്ടം ഉണ്ടാവുന്നതായും കോര്‍പറേഷന്‍ വ്യക്തമാക്കി. കെ.എസ്.ആര്‍.ടി.സിയെ പുനഃസംഘടിപ്പിക്കാന്‍ രൂപീകരിച്ച സുശീല്‍ ഖന്ന റിപ്പോര്‍ട്ട് പ്രകാരം പുതിയ നിയമനങ്ങള്‍ പാടില്ല. നിലവിലുള്ളവരെ പരമാവധി ഉപയോഗിക്കണമെന്നാണ് ശുപാര്‍ശ. അതിനാലാണ് അവധിക്ക് പോയവരെ തിരികെ കൊണ്ടുവരുന്നതെന്നുമുള്ള കെ.എസ്.ആര്‍.ടി.സി വാദം കോടതി അംഗീകരിക്കുകയായിരുന്നു.