തിരുവനന്തപുരം: 2015ലെ സംസ്ഥാന മാധ്യമ അവാര്‍ഡുകള്‍ പ്രഖ്യാപിച്ചു. ജനറല്‍ റിപ്പോര്‍ട്ടിങ്ങിന് ദീപിക ദിനപത്രത്തിലെ രഞ്ജിത് ജോണും, ന്യൂസ് ഫോട്ടോഗ്രാഫിയില്‍ മലയാള മനോരമ ഫോട്ടോഗ്രാഫര്‍ റസല്‍ ഷാഹുലും, കാര്‍ട്ടൂണ്‍ വിഭാഗത്തില്‍ കേരള കൗമുദിയിലെ ടി.കെ സുജിതും അര്‍ഹരായി. ടി.വി റിപ്പോര്‍ട്ടിങ്ങിന് മാതൃഭൂമി ന്യൂസിലെ ബിജു പങ്കജിനാണ് പുരസ്‌കാരം. ടി.വി ന്യൂസ് എഡിറ്റിങ്ങിന് മനോരമ ന്യൂസിലെ ബിനീഷ് ബേബിയും, ന്യൂസ് കാമറ വിഭാഗത്തില്‍ മാതൃഭൂമി ന്യൂസിലെ ബിനു തോമസും അര്‍ഹരായി.
25,000 രൂപയും ഫലകവും പ്രശസ്തി പത്രവുമാണ് പുരസ്‌കാരം. ഇന്‍ഫര്‍മേഷന്‍ ആന്‍ഡ് പബ്ലിക് റിലേഷന്‍സ് അഡീഷണല്‍ ചീഫ് സെക്രട്ടറി ഷീലാ തോമസാണ് അവാര്‍ഡുകള്‍ പ്രഖ്യാപിച്ചത്. 2016ലെ അവാര്‍ഡുകള്‍ ഈ വര്‍ഷംതന്നെ പ്രഖ്യാപിക്കുമെന്ന് ഷീലാ തോമസ് അറിയിച്ചു. മീഡിയ അക്കാദമി ചെയര്‍മാന്‍ ആര്‍.എസ് ബാബു, ഐ.പി.ആര്‍.ഡി ഡയറക്ടര്‍ അമ്പാടി, അഡീഷണല്‍ ഡയറക്ടര്‍മാരായ പി. വിനോദ്, കെ. സന്തോഷ് കുമാര്‍ എന്നിവരും വാര്‍ത്താ സമ്മേളനത്തില്‍ പങ്കെടുത്തു.